സിനിമാസ്വാദകര് ഏറെ പ്രതീക്ഷയോടെ കാത്തിരിക്കുന്ന മമ്മൂട്ടി ചിത്രം സിബിഐ 5 ദ ബ്രെയിന് ഞായറാഴ്ചയാണ് തിയേറ്ററുകളിലെത്തിയത്. പ്രേക്ഷക- നിരൂപക പ്രശംസകള് ഒരുപോലെ നേടി മുന്നേറുകയാണ് ചിത്രം. സിബിഐ സിരീസ് എന്ന പ്രേക്ഷകരിലെ നൊസ്റ്റാള്ജിയയെ ആവശ്യത്തിനു മാത്രം ഉപയോഗപ്പെടുത്തിക്കൊണ്ടാണ് കെ മധു ചിത്രം സംവിധാനം ചെയ്തിരിക്കുന്നത്. ഇപ്പോഴിതാ ചിത്രത്തിലെ ജഗതിയുടെ സാന്നിധ്യത്തെ കുറിച്ചുള്ള ഫെയ്സ്ബുക്ക് കുറിപ്പാണ് വൈറലാകുന്നത്.
‘മലയാള സിനിമയില് ജഗതിയുടെ സാന്നിധ്യമില്ലാത്ത ചിത്രങ്ങള് വിരളമായ ഒരു കാലഘട്ടത്തില് നിന്നും ജഗതി ഇല്ലാത്ത സിനിമകളിലൂടെ മലയാള സിനിമ ഒരു പതിറ്റാണ്ട് പിന്നിടുന്നു. ഹാസ്യ സാമ്രാട്ട് ജഗതിയുടെ അഭാവം മലയാളികളുടെ മനസ്സിലെ എന്നത്തെയും നൊമ്പരമായി അവശേഷിക്കുന്നു എന്നത് അടിവരയിട്ട് തെളിയിക്കുന്നതാണ് സിബിഐ- 5ല് ജഗതിയെ കാണിക്കുമ്പോള് ഉള്ള തീയേറ്ററിലെ ആരവം’ എന്ന് ബിജു തങ്കച്ചന് കുറിക്കുന്നു.