നടന്‍ ബിനീഷ് ബാസ്റ്റിന്‍ തന്റെ വീട്ടിലേക്ക് പുതുതായി ടിവി വാങ്ങിയ കാര്യം സോഷ്യല്‍ മീഡിയയില്‍ വൈറലായിരുന്നു. ട്രോളുകളായാണ് നടന്റെ ടിവി സോഷ്യല്‍ ലോകത്ത് വൈറലായത്. പുതിയ ടിവി താരം അളന്നു നോക്കുന്ന വീഡിയോയാണ് വൈറലായിരുന്നത്. 55 ഇഞ്ച് ടിവി വാങ്ങിയിട്ട് അളന്ന് നോക്കിയപ്പോള്‍ 45 ഇഞ്ച് മാത്രമേ ഉള്ളൂവെന്നായിരുന്നു താരം പരാതി പറഞ്ഞത്. ബിനീഷിന്റെ ഈ പരാമര്‍ശമാണ് ട്രോളന്മാര് ഏറ്റെടുത്തത്. ആ സംഭവത്തെ കുറിച്ച് തുറന്നുപറയുകയാണ് ബിനീഷ്.
ഞാന്‍ ടിവി മേടിച്ചപ്പോള്‍ ലോകം മുഴുവന്‍ അറിഞ്ഞു, കാരണം ഞാന്‍ ടിവി അളന്ന് നോക്കിയ ആളാണ്. കേരളത്തിലെ എല്ലാ ട്രോളന്‍മാരും എന്നെ ട്രോളി. പക്ഷേ, ആ ട്രോളുകള്‍ സമൂഹത്തിനൊരു മെസേജ് കൂടിയായിരുന്നു എന്ന് താരം പറയുന്നു.
ടിവി ഇഞ്ച് കണക്കിനാണ് അളക്കേണ്ടത് എന്നാണ് ഞാന്‍ കരുതിയത്. ഞാന്‍ അത് ടേപ്പുകൊണ്ട് അളന്നപ്പോഴാണ് പലരും ഇങ്ങനെയല്ല, അങ്ങനെയാണ് അളക്കേണ്ടതെന്ന് പറഞ്ഞുതന്നത്. അത് എന്റെ അറിവില്ലായ്മയായിരുന്നു.
ഞാന്‍ ഒരു മേസനായിരുന്നു. എപ്പോഴും ടേപ്പുകൊണ്ട് വട്ടവും നീളവുമൊക്കെ അളക്കുന്ന ആളാണ്. ഞാനോര്‍ത്തു നീളത്തിലാണ് ടിവി അളക്കേണ്ടതെന്ന്, സംഭവത്തെ കുറിച്ച് ബിനീഷ് പറയുന്നു.
’54 ഇഞ്ചിന്റെ ടിവിയാണ് ഞാന്‍ വാങ്ങിയിരുന്നത്. ഒറ്റ നോട്ടത്തില്‍ 54 ഇഞ്ചുണ്ടോ എന്ന് എനിക്ക് സംശയം തോന്നി. അങ്ങനെ ഞാന്‍ ടേപ്പെടുത്ത് അളന്ന് നോക്കിയപ്പോള്‍ അത്രയുമില്ല, 49 ഇഞ്ചേ ഉണ്ടായിരുന്നുള്ളൂ. എന്നാല്‍ ആള്‍ക്കാരെയൊക്കെ ഒന്ന് അറിയിച്ച് കളയാമെന്ന് ഞാനും കരുതി. ടിവി കമ്പനിക്കാര് പറ്റിച്ചതാണെന്ന് വിചാരിച്ചാണ് ഞാന്‍ ആ വീഡിയോ എടുത്തിട്ടത്. എന്നാല്‍ എന്റെ വീഡിയോയ്ക്ക് അതുവരെയും കിട്ടാത്ത റീച്ചായിരുന്നു ആ ഒരൊറ്റ വീഡിയോയ്ക്ക് ലഭിച്ചത്.
അതിന് താഴെ ബുദ്ധി ജീവികളാണ് കൂടുതല്‍ കമന്റിട്ടത്. എന്റെ വീട്ടുകാര്‍ക്കും, കൂട്ടുകാര്‍ക്കുമൊന്നും ടിവി എങ്ങനെയാണ് അളക്കേണ്ടതെന്ന് അറിയാത്ത കാര്യമായിരുന്നു.
കോണോട് കോണ്‍ ആണ് ടിവി അളക്കേണ്ടതെന്ന് അങ്ങനെയാണ് എനിക്ക് മനസ്സിലാക്കാനായത്. ഒരുപാട് ട്രോളുകള്‍ വന്നപ്പോഴു ഞാന്‍ ചോദിച്ചത് നീളം അളക്കുന്നതിന് എന്താ കുഴപ്പം എന്നാണ്. അതിനെയും വിമര്‍ശിച്ച് ഒത്തിരിപേര്‍ എത്തിയിരുന്നു. ശരിയ്ക്കും ഈ ട്രോളെല്ലാം കണ്ടപ്പോള്‍ എനിക്ക് ചിരിയാണ് വന്നത്. ട്രോളന്മാര് കിടിലന്‍ ടീമാണ് എന്നും ബിനീഷ് കൂട്ടിച്ചേര്‍ത്തു.
