മലയാള സിനിമ-സീരിയൽ രംഗത്തെ ശ്രദ്ധേയ സാന്നിധ്യമായ നടി മീര വാസുദേവ് വിവാഹമോചിതയായ വിവരം ഔദ്യോഗികമായി അറിയിച്ചു. ക്യാമറാമാൻ വിപിൻ പുതിയങ്കവുമായുള്ള ഒരു വർഷം നീണ്ട ദാമ്പത്യമാണ് താരം അവസാനിപ്പിച്ചത്. 2025 നവംബർ 17-നാണ് മീര ഈ വിവരം സോഷ്യൽ മീഡിയയിലൂടെ ആരാധകരെ അറിയിച്ചത്.
താന് 2025 ഓഗസ്റ്റ് മാസം മുതൽ സിംഗിളായി ജീവിക്കുകയാണെന്ന് മീര സോഷ്യൽ മീഡിയയിൽ കുറിച്ചു. “ഞാൻ ഇപ്പോൾ എന്റെ ജീവിതത്തിലെ ഏറ്റവും മനോഹരവും സമാധാനപരവുമായ ഒരു ഘട്ടത്തിലാണ്,” എന്നും താരം കൂട്ടിച്ചേർത്തു. മുൻ ഭർത്താവുമൊത്തുള്ള ചിത്രങ്ങൾ ഉൾപ്പെടെയുള്ള ഉള്ളടക്കങ്ങൾ മീര തന്റെ പേജുകളിൽ നിന്ന് നീക്കം ചെയ്തിട്ടുണ്ട്.
കഴിഞ്ഞ വർഷം മേയ് മാസമായിരുന്നു 43 വയസ്സുകാരിയായ മീരയും വിപിൻ പുതിയങ്കവും വിവാഹിതരായത്. ഇത് മീരയുടെ മൂന്നാമത്തെ വിവാഹബന്ധമായിരുന്നു. മോഹൻലാലിനൊപ്പമുള്ള ‘തന്മാത്ര’ എന്ന ചിത്രത്തിലൂടെയാണ് മീര വാസുദേവ് മലയാള സിനിമയിൽ ശ്രദ്ധനേടിയത്. മിനിസ്ക്രീനിലെ ഹിറ്റ് പരമ്പരയായ ‘കുടുംബവിളക്ക്’ വഴിയും താരം പ്രേക്ഷകരുടെ പ്രിയങ്കരിയായി തുടരുകയാണ്. അഭിനയരംഗത്തെ തന്റെ 25 വർഷം പൂർത്തിയാക്കിയതിന്റെ സന്തോഷവും മീര അടുത്തിടെ പങ്കുവെച്ചിരുന്നു.
