ചെന്നൈ: തെന്നിന്ത്യൻ താരം ധനുഷിനെതിരെ 20 കോടി രൂപ നഷ്ടപരിഹാരം ആവശ്യപ്പെട്ട് നിയമനടപടിയുമായി നിർമ്മാണ കമ്പനിയായ തേനാൻഡൽ ഫിലിംസ്. വർഷങ്ങൾക്ക് മുമ്പ് ആരംഭിച്ച ഒരു ചിത്രത്തിന്റെ നിർമ്മാണം തടസ്സപ്പെട്ടതിലൂടെ ഉണ്ടായ കനത്ത സാമ്പത്തിക നഷ്ടം നികത്താനാണ് കമ്പനിയുടെ നീക്കം. 2016-ൽ കരാറൊപ്പിട്ട ‘നാൻ രുദ്രൻ’ എന്ന സിനിമയുടെ പൂർത്തീകരണവുമായി ബന്ധപ്പെട്ടാണ് നിലവിലെ തർക്കം ഉടലെടുത്തിരിക്കുന്നത്.
ധനുഷ് ആദ്യമായി സംവിധാനം ചെയ്യാൻ തീരുമാനിച്ച ഈ ബ്രഹ്മാണ്ഡ ചിത്രത്തിൽ നാഗാർജുന, എസ്.ജെ. സൂര്യ തുടങ്ങിയ വൻ താരനിരയെയായിരുന്നു നിശ്ചയിച്ചിരുന്നത്. എന്നാൽ ചിത്രത്തിന്റെ തിരക്കഥ പൂർത്തിയാക്കി നൽകുന്നതിലും ഷൂട്ടിംഗിന് ആവശ്യമായ ‘കോൾ ഷീറ്റ്’ അനുവദിക്കുന്നതിലും ധനുഷ് വീഴ്ച വരുത്തിയതായി നിർമ്മാതാക്കൾ ആരോപിക്കുന്നു. പകുതിയോളം ചിത്രീകരണം പൂർത്തിയായ സിനിമ ധനുഷ് മറ്റ് പ്രോജക്റ്റുകളുടെ തിരക്കിലായതോടെ പാതിവഴിയിൽ നിലയ്ക്കുകയായിരുന്നു എന്നാണ് റിപ്പോർട്ടുകൾ.
ചിത്രത്തിനായി ഇതിനകം വലിയ തുക ചെലവഴിച്ചതായും ധനുഷിന്റെ ഭാഗത്തുനിന്നുള്ള നിസ്സഹകരണം കാരണം തങ്ങൾക്ക് വലിയ നഷ്ടം സംഭവിച്ചതായും തേനാൻഡൽ ഫിലിംസ് നോട്ടീസിൽ വ്യക്തമാക്കുന്നു. 2025 അവസാനത്തോടെ ഷൂട്ടിംഗ് പുനരാരംഭിക്കാൻ ഡേറ്റ് നൽകാമെന്ന് നേരത്തെ ധനുഷ് ഉറപ്പുനൽകിയിരുന്നുവെങ്കിലും അത് പാലിക്കപ്പെട്ടില്ലെന്ന് കമ്പനിയുടെ അഭിഭാഷകൻ ആരോപിച്ചു. 20 കോടി രൂപയുടെ നഷ്ടപരിഹാരത്തിന് പുറമെ ഒരു കോടി രൂപ അധികമായി നൽകണമെന്നും അല്ലാത്തപക്ഷം ശക്തമായ നിയമനടപടികളുമായി മുന്നോട്ട് പോകുമെന്നും നോട്ടീസിൽ പറയുന്നു.
നയൻതാരയുമായുള്ള പത്തു കോടി രൂപയുടെ നിയമപോരാട്ടം തുടരുന്നതിനിടെയാണ് ധനുഷിനെ തേടി പുതിയ വിവാദം കൂടി എത്തുന്നത്. ഇതേക്കുറിച്ച് താരം ഇതുവരെ ഔദ്യോഗികമായ പ്രതികരണങ്ങളൊന്നും നടത്തിയിട്ടില്ല. നിലവിൽ മറ്റ് ചിത്രങ്ങളുടെ തിരക്കിലുള്ള ധനുഷിന് ഈ പുതിയ നിയമക്കുരുക്ക് വലിയ തലവേദനയാകുമെന്നാണ് സിനിമാ ലോകത്തെ വിലയിരുത്തലുകൾ.
