പൃഥ്വിരാജ് സുകുമാരനെ നായകനാക്കി വൈശാഖ് സംവിധാനം ചെയ്ത ബിഗ് ബജറ്റ് ആക്ഷൻ ചിത്രം ‘ഖലീഫ’ തിയേറ്ററുകളിൽ നേരിട്ട ബോക്സ് ഓഫീസ് തിരിച്ചടിക്ക് പിന്നിൽ സംഘടിതമായ റിവ്യൂ ബോംബിംഗും വ്യക്തിവൈരാഗ്യവുമാണെന്ന ചർച്ചകൾ സോഷ്യൽ മീഡിയയിൽ സജീവമാകുന്നു. സിനിമയ്ക്കെതിരെ നടന്ന വ്യാജ പ്രചാരണങ്ങളെയും വിദ്വേഷ പ്രചാരണങ്ങളെയും ചൂണ്ടിക്കാട്ടുന്ന കുറിപ്പുകൾ പങ്കുവെച്ചുകൊണ്ടാണ് അണിയറപ്രവർത്തകരും ആരാധകരും രംഗത്തെത്തിയിരിക്കുന്നത്.
വലിയ പ്രതീക്ഷകളോടെ തിയേറ്ററുകളിലെത്തിയ ചിത്രത്തിനെതിരെ ആദ്യദിനം മുതൽ തന്നെ ആസൂത്രിതമായ രീതിയിൽ നെഗറ്റീവ് റിവ്യൂകൾ പ്രചരിപ്പിക്കപ്പെട്ടിരുന്നു. പൃഥ്വിരാജ് എന്ന വ്യക്തിയോടും അദ്ദേഹത്തിന്റെ നിലപാടുകളോടുമുള്ള വിദ്വേഷമാണ് ചില വിഭാഗങ്ങൾ സിനിമയ്ക്കെതിരെ തിരിയാൻ കാരണമെന്നും, ഇത് ചിത്രത്തിന്റെ ബോക്സ് ഓഫീസ് ചലനങ്ങളെ പ്രതികൂലമായി ബാധിച്ചുവെന്നും സോഷ്യൽ മീഡിയ പോസ്റ്റുകളിൽ വ്യക്തമാക്കുന്നു.
സിനിമയുടെ നിർമ്മാണ മികവിനെയും സാങ്കേതിക തികവിനെയും പൂർണ്ണമായി തള്ളിക്കളഞ്ഞുകൊണ്ടുള്ള ഇത്തരം പ്രചാരണങ്ങൾ വ്യാവസായികമായി വലിയ തിരിച്ചടിയാണ് ഉണ്ടാക്കിയത്. എന്നാൽ ചിത്രത്തിന്റെ ഒടിടി റിലീസിന് ശേഷം നിരവധി പ്രേക്ഷകരാണ് ഖലീഫയെ പ്രശംസിച്ചും തിയേറ്ററുകളിൽ നേരിട്ട നീതികേടിനെ ചോദ്യം ചെയ്തും രംഗത്തെത്തുന്നത്.
