തമിഴ്‌നാട് മുൻ മുഖ്യമന്ത്രിയും ഇതിഹാസ നടനുമായിരുന്ന എം.ജി. രാമചന്ദ്രന്റെ ജീവിതകഥ സിനിമയാകുന്നു. ‘പുരട്ചി തലൈവർ എം.ജി.ആർ’ എന്ന് പേരിട്ടിരിക്കുന്ന ചിത്രത്തിൽ ജയലളിതയുടെ വേഷത്തിൽ തൃഷ എത്തുമെന്നാണ് പുതിയ റിപ്പോർട്ടുകൾ. എം.ജി.ആറായി നടൻ ജെ.എം. ബഷീർ വേഷമിടുന്ന ചിത്രത്തിന്റെ ഷൂട്ടിങ് ഉടൻ ആരംഭിക്കുമെന്നാണ് വിവരം. ജയലളിതയുടെ കഥാപാത്രത്തിനായി തൃഷയുമായി ചർച്ചകൾ പുരോഗമിക്കുകയാണെന്ന് ജെ.എം. ബഷീറിനെ ഉദ്ധരിച്ച് തമിഴ് ദിനപത്രമായ ദിനമലർ റിപ്പോർട്ട് ചെയ്തു. ജയലളിതയായി തൃഷ എത്തിയാൽ കഥാപാത്രത്തിന് ഏറെ അനുയോജ്യമായിരിക്കുമെന്ന് ജെ.എം. ബഷീർ അഭിപ്രായപ്പെട്ടു. താരവുമായി ഇതുസംബന്ധിച്ച ചർച്ചകൾ നടന്നുവരികയാണെന്നും അദ്ദേഹം വ്യക്തമാക്കി. തന്റെ മകളും തൃഷയും സുഹൃത്തുക്കളാണെന്നും ഇരുവരും ഒരു സിനിമയിൽ ഒരുമിച്ച് പ്രവർത്തിക്കുന്നുണ്ടെന്നും ബഷീർ കൂട്ടിച്ചേർത്തു.
ചെന്നൈയിലെ രാമപുരത്തായിരിക്കും ചിത്രത്തിന്റെ ഷൂട്ടിങ് ആരംഭിക്കുക. സിനിമയുടെ സംവിധായകൻ, സംഗീതസംവിധായകൻ തുടങ്ങിയ അണിയറപ്രവർത്തകരുടെ വിവരങ്ങൾ ഉടൻ പുറത്തുവിടുമെന്നും ബഷീർ അറിയിച്ചു. എം.ജി.ആറിന്റെ ജീവിതത്തിലെ പ്രധാന വ്യക്തികളായിരുന്ന സി.എൻ. അണ്ണാദുരൈ, എം. കരുണാനിധി തുടങ്ങിയ രാഷ്ട്രീയ നേതാക്കളുടെ കഥാപാത്രങ്ങളും ചിത്രത്തിലുണ്ടാകും. എം.ജി.ആറിന്റെ സിനിമാജീവിതവും രാഷ്ട്രീയത്തിലേക്കുള്ള കടന്നുവരവും തമിഴ്‌നാട് രാഷ്ട്രീയത്തിൽ അദ്ദേഹം സൃഷ്ടിച്ച സ്വാധീനവുമാണ് സിനിമയുടെ പ്രധാന പ്രമേയം. സിനിമയിലും രാഷ്ട്രീയത്തിലും ഒരുപോലെ ചരിത്രം സൃഷ്ടിച്ച വ്യക്തിത്വത്തിന്റെ ജീവിതം വെള്ളിത്തിരയിലെത്തുമ്പോൾ ആരാധകരും വലിയ പ്രതീക്ഷയിലാണ്.
അതേസമയം, ജയലളിതയുടെ വേഷം അവതരിപ്പിക്കാൻ തൃഷ ഔദ്യോഗികമായി സമ്മതം അറിയിച്ചിട്ടില്ല. 2017ൽ ആരാധകരുടെ ചോദ്യത്തിന് മറുപടിയായി, ഒരു ബയോപിക്കിൽ അഭിനയിക്കാൻ അവസരം ലഭിച്ചാൽ ജയലളിതയുടെ കഥാപാത്രത്തെ തിരഞ്ഞെടുക്കുമെന്ന ആഗ്രഹം തൃഷ പ്രകടിപ്പിച്ചിരുന്നു. അതിനാൽ പുതിയ റിപ്പോർട്ടുകൾക്ക് ആരാധകർക്കിടയിൽ പ്രത്യേക ശ്രദ്ധയാണ് ലഭിക്കുന്നത്. ജയലളിതയും എം.ജി.ആറും തമ്മിലുള്ള വ്യക്തിപരവും രാഷ്ട്രീയവുമായ ബന്ധം സിനിമയിൽ എങ്ങനെ അവതരിപ്പിക്കുമെന്ന ആകാംക്ഷയിലാണ് തമിഴ് സിനിമാപ്രേമികൾ. തൃഷയുടെ കാസ്റ്റിങ്ങിൽ ഔദ്യോഗിക പ്രഖ്യാപനം വന്നാൽ ചിത്രത്തെക്കുറിച്ചുള്ള ചർച്ചകൾ കൂടുതൽ സജീവമാകുമെന്നാണ് പ്രതീക്ഷ.
