തെന്നിന്ത്യൻ സിനിമയിൽ നിരവധി ബോക്സ് ഓഫീസ് വിജയങ്ങൾ സമ്മാനിച്ച സംവിധായകൻ ഷങ്കർ, തന്റെ കരിയറിലെ സ്വപ്ന ചിത്രവുമായി പ്രേക്ഷകർക്ക് മുന്നിലേക്ക് എത്താൻ ഒരുങ്ങുന്നു. ‘വേൽപാരി’ എന്ന് പേരിട്ടിരിക്കുന്ന ഈ പ്രോജക്റ്റിന്റെ പുതിയ വിവരങ്ങളാണ് ഇപ്പോൾ പുറത്തുവരുന്നത്. രാജമൗലിയുടെ ‘വാരണാസി’ പ്രോജക്റ്റിനൊപ്പം ബഡ്ജറ്റിൽ മത്സരിക്കുന്ന ഒരു ബ്രഹ്മാണ്ഡ ചിത്രമായിരിക്കും ഷങ്കറിന്റെ ഈ പുതിയ സംരംഭം.
സു വെങ്കടേശൻ എഴുതിയ പ്രശസ്ത ചരിത്ര നോവലായ ‘വീര യുഗ നായകൻ വേൽപാരി’യെ ആസ്പദമാക്കിയാണ് ചിത്രം ഒരുങ്ങുന്നത്. തമിഴ് സംഘകാല സാഹിത്യത്തിൽ വേരുകളുള്ള ഈ കഥയെ ലോകനിലവാരത്തിൽ അവതരിപ്പിക്കാനാണ് ഷങ്കർ ലക്ഷ്യമിടുന്നത്. ചിത്രത്തിന്റെ തിരക്കഥാ ജോലികൾ ഇതിനോടകം പൂർത്തിയായിട്ടുണ്ട്.
പാരി എന്ന നായക കഥാപാത്രത്തെ കേന്ദ്രീകരിച്ച് മൂന്ന് ഭാഗങ്ങളായാകും ചിത്രം എത്തുക. മുല്ലൈ ദേശത്തെ ഭരണാധികാരിയായിരുന്ന പാരി, ചേര, ചോള, പാണ്ഡ്യ സാമ്രാജ്യങ്ങൾക്കെതിരെ വലിയ യുദ്ധങ്ങൾ നയിച്ച ചരിത്രമാണ് സിനിമയുടെ പ്രമേയം.
“എന്റെ സ്വപ്ന പ്രോജക്റ്റ് ‘എന്തിരൻ’ ആണെന്നാണ് ഞാൻ കരുതിയിരുന്നത്. എന്നാൽ ഇപ്പോഴതല്ല. ‘വേൽപാരി’യാണ് എന്നെ ഇപ്പോൾ ഏറ്റവും പ്രചോദിപ്പിക്കുന്ന സിനിമ. ‘ഗെയിം ഓഫ് ത്രോൺസ്’ പോലെയോ ‘അവതാർ’ പോലെയോ ലോക നിലവാരത്തിലുള്ള ഒരു ചിത്രമായിരിക്കും അത്,” അടുത്തിടെ ഒരു വേദിയിൽ ഷങ്കർ പറഞ്ഞിരുന്നു. ഈ വേദിയിൽ പങ്കെടുത്ത രജനികാന്തും ഷങ്കറിന്റെ പുതിയ സംരംഭത്തിന് ആശംസകൾ നേർന്നിരുന്നു. 2018-ന് ശേഷം ഒരു വലിയ വിജയം നേടാൻ ഷങ്കറിന് സാധിച്ചിട്ടില്ലാത്ത സാഹചര്യത്തിൽ ഈ ചിത്രം പ്രതീക്ഷ നൽകുന്ന ഒന്നാണ്.
