നടനും അവതാരകനുമായ ഗോവിന്ദ് പത്മസൂര്യയുടെയും നടി ഗോപിക അനിലും വിവാഹത്തിനുള്ള കാത്തിരിപ്പിലാണ് ആരാധകർ. ജനുവരി 28നാണ് ഈ താരവിവാഹം. ഇപ്പോൾ മോഹൻലാലിനെ കണ്ട് അനുഗ്രഹം വാങ്ങാൻ എത്തിയ ജിപിയുടെയും ഗോപികയുടെയും ചിത്രങ്ങളാണ് പുറത്ത് വന്നിട്ടുള്ളത്. ബാലേട്ടൻ എന്ന സൂപ്പർ ഹിറ്റ് ചിത്രത്തിൽ മോഹൻലാലിനൊപ്പം ഗോപികയും സഹോദരി കീർത്തനയും അഭിനയിച്ചിരുന്നു. സിനിമയിൽ മോഹൻലാലിന്റെ മക്കളായാണ് ഇരുവരും അഭിനയിച്ചത്.
അച്ഛനായി അഭിനയിച്ച മോഹൻലാലിനെ കാണാനും വിവാഹത്തിന് ക്ഷണിക്കാനും ഗോപികയെത്തിയ വീഡിയോ ജിപി തന്റെ യുട്യൂബ് ചാനലിലൂടെ പങ്കുവയ്ക്കുകയായിരുന്നു. വിവാഹത്തിന് മോഹൻലാലിനെ കൊണ്ടുവരിക എന്നത് വലിയ ആഗ്രഹം ആയിരുന്നുലെന്ന് ജിപി പറയുന്നുണ്ട്. എന്നാൽ, ആ സമയത്ത് ഷൂട്ടിംഗ് തിരക്കുണ്ടെന്ന് അദ്ദേഹം അറിയിച്ചു. ഇതോടെയാണ് കുടുംബത്തോടൊപ്പം മോഹൻലാലിനെ കാണാൻ എത്തുകയായിരുന്നു.
വിവിഹ ക്ഷണക്കത്തിനൊപ്പം മുണ്ടും നൽകി ജിപിയും ഗോപികയും മോഹൻലാലിന്റെ അനുഗ്രഹം തേടുന്നതാണ് വീഡിയോയിൽ ഉള്ളത്. ബാലേട്ടനിൽ തന്റെ മക്കളായി അഭിനയിച്ച ഗോപികയോടും സഹോദരിയോടും മോഹൻലാൽ വാത്സല്യപൂർവം ഇടപെടുന്നതും വീ‍ഡിയോയിലുണ്ട്. ‘ബാലേട്ടൻറെ കുട്ടികളൊക്കെ വളർന്നു’ എന്ന കമന്റുകളാണ് ആരാധകർ കുറിക്കുന്നത്.