പൃഥ്വിരാജിനെയും ബേസില് ജോസഫിനെയും പ്രധാന കഥാപാത്രങ്ങളാക്കി വിപിന് ദാസൊരുക്കിയ ചിത്രം ഗുരുവായൂരമ്പലനടയില് തിയ്യേറ്ററില് മികച്ച വിജയം നേടി മുന്നേറുകയാണ്. വിഷു റിലീസായി എത്തിയ ചിത്രം ഇതിനോടകം തന്നെ 50 കോടി നേടി കഴിഞ്ഞു.
പൃഥ്വിയും ബേസിലും പൊട്ടിച്ചിരി നിറയ്ക്കുകയാണ് ചിത്രത്തിലൂടെ. അതേസമയം ചിത്രത്തിന്റെ സെറ്റ് വലിയ രീതിയില് ശ്രദ്ധേയമായിരുന്നു. ഒറ്റ നോട്ടത്തില് പക്കാ ഗുരുവായൂര് ക്ഷേത്രമെന്ന് തോന്നുന്ന വിധത്തിലായിരുന്നു ചിത്രത്തിന്റെ സെറ്റ്. കളമശ്ശേരിയിലായിരുന്നു ആ വൈറല് സെറ്റൊരുക്കിയത്.
ചിത്രത്തിലെ ക്ലൈമാക്സ് രംഗത്തിന്റേതാണ് ഗുരുവായൂരമ്പലത്തിന്റെ സെറ്റ്. നാലു കോടിയോളം ചെലവിട്ടാണ് ഗുരുവായൂര് അമ്പലത്തിന്റെ സെറ്റ് ഒരുക്കിയത്. ഇപ്പോഴിതാ സെറ്റൊരുക്കിയതിന്റെ വീഡിയോ പങ്കുവച്ചിരിക്കുകയാണ് പൃഥ്വിരാജ്.
കണ്ടാല് തൊഴുതു പോകുന്ന സെറ്റിന് പിന്നിലെ സെറ്റപ്പ് ഇതാണ് എന്നു പറഞ്ഞാണ് പൃഥ്വി വീഡിയോ പങ്കുവച്ചത്. സുനില് കുമാറാണ് ചിത്രത്തിന്റെ ആര്ട് ഡയറക്ടര്. മുന്പ് സെറ്റിലെത്തി എന്നും പ്രാര്ഥിച്ച് പോകുന്ന സ്ത്രീയുടെ വീഡിയോയും അണിയറപ്രവര്ത്തകര് പുറത്തുവിട്ടിരുന്നു.
പൃഥ്വിരാജ് പ്രൊഡക്ഷന്സിന്റെ ബാനറില് സുപ്രിയ മേനോനും, ഇ4 എന്റര്ടൈന്മെന്റിന്റെ ബാനറില് മുകേഷ് ആര് മേത്ത, സി വി സാരഥി എന്നിവരാണ് ചിത്രം നിര്മ്മിക്കുന്നത്. പ്രൊഡക്ഷന് കണ്ട്രോളര് റിനി ദിവാകര്, സംഗീതം അങ്കിത് മേനോന്, മേക്കപ്പ് സുധി സുരേന്ദ്രന്, പ്രൊഡക്ഷന് എക്സിക്യൂട്ടീവ് അനീഷ് നന്ദിപുലം. അരുണ് എസ് മണി ആണ് ചിത്രത്തിന്റെ സൗണ്ട് ഡിസൈനര്. പൃഥ്വിരാജിന്റെ ഗുരുവായൂര് അമ്പലനടയില് സെക്കന്റ് യൂണിറ്റ് ക്യാമറ അരവിന്ദ് പുതുശ്ശേരി, വിനോഷ് കൈമള്, സ്റ്റില്സ് ജസ്റ്റിന്, ഓണ്ലൈന് മാര്ക്കറ്റിംഗ് ടെന് ജി.