മലയാളി മനസ്സിലെ അനശ്വര കലാകാരനാണ് കൊല്ലം സുധി. അഭിനയ ജീവിതത്തില്‍ ഉയരങ്ങള്‍ തേടുന്നതിനിടെ അകാലത്തിലാണ് വിധി സുധിയെ കവര്‍ന്നത്. സിനിമാ ലോകത്തും ശ്രദ്ധേയമായ കഥാപാത്രങ്ങളിലൂടെ കരിയറില്‍ തിളങ്ങി നില്‍ക്കുകയായിരുന്നു താരം. സ്റ്റാര്‍മാജികിലൂടെ ജനപ്രിയ താരമായി നിറഞ്ഞുനില്‍ക്കുന്നതിനിടെയാണ് വിധി സുധിയെ കവര്‍ന്നത്. 2023 ജൂണ്‍ അഞ്ചിന് തൃശ്ശൂര്‍ കൈപ്പമംഗലത്ത് വെച്ചുണ്ടായ അപകടത്തിലാണ് സുധി മരണപ്പെട്ടത്. സുധി സഞ്ചരിച്ചിരുന്ന കാര്‍ പിക്കപ്പ് ട്രക്കുമായി കൂട്ടിയിടിച്ചാണ് അപകടമുണ്ടായത്.
സുധിയുടെ വിയോഗ ശേഷം ഭാര്യ രേണുവും മക്കളുമെല്ലാം സാധാരണ ജീവിതത്തിലേക്ക് എത്തുന്നതേയുള്ളൂ. സോഷ്യല്‍മീഡിയയില്‍ സജീവമാണ് രേണു, റീല്‍സും മക്കളുടെ വിശേഷങ്ങളുമെല്ലാം താരം പങ്കുവയ്ക്കാറുണ്ട്. അതിനെതിരെ വലിയ വിമര്‍ശനവും രേണു നേരിട്ടിരുന്നു.
സുധി ചേട്ടന്‍ മരിച്ചെങ്കിലും തനിക്ക് അത് വിശ്വസിക്കാന്‍ സാധിക്കുന്നില്ല, തന്നോടൊപ്പം എന്നും സുധി ചേട്ടന്‍ ഉണ്ട് എന്നാണ് രേണു പറയാറുള്ളത്. ഇപ്പോഴിതാ രേണുവിന്റെ പുതിയ വിശേഷമാണ് സോഷ്യലിടത്ത് നിറയുന്നത്. അഭിനയത്തിലേക്ക് ചുവടുവച്ചിരിക്കുകയാണ് രേണുവും. രേണു ആദ്യമായി ഒരു ആല്‍ബത്തില്‍ അഭിനയിച്ചിരിക്കുകയാണ്. ”കുഞ്ഞു പൂവേ”എന്നാണ് ആല്‍ബത്തിന്റെ പേര്.
രേണു തന്നെയാണ് സന്തോഷ വാര്‍ത്ത പങ്കുവച്ചത്. രേണു ആല്‍ബത്തിന്റെ ചെറിയ ഒരു ഭാഗം പുറത്തുവിട്ടിട്ടുണ്ട്. സൂര്യ ഗായത്രിയാണ് ആല്‍ബത്തിന്റെ ഡയറക്ടര്‍. നേഴ്‌സിന്റെ വേഷത്തിലാണ് രേണു എത്തുന്നത്.
ആല്‍ബത്തിന് ആശംസകള്‍ അറിയിച്ചാണ് രേണു വീഡിയോ പങ്കുവച്ചിരിക്കുന്നത്. എന്റെ ഫസ്റ്റ് ആല്‍ബം കുഞ്ഞുപൂവേ വരുന്നു…സൂര്യഗായത്രി മാമിന് നന്ദി. കുഞ്ഞുപൂവേ ടീമിന് എല്ലാ വിധ ആശംസകളും എന്നാണ് രേണു പങ്കുവച്ചത്. നിരവധി പേരാണ് രേണുവിന്റെ പുതിയ ചുവടുവയ്പ്പിന് ആശംസകള്‍ നേരുന്നത്.
