കഷ്ടം, പരമ കഷ്ടം!! എത്ര കെഎസ് ചിത്രമാര്‍ തനി സ്വരൂപം കാട്ടാന്‍ ഇരിക്കുന്നു- ഗായകന്‍ സൂരജ് സന്തോഷ്

വാനമ്പാടി കെഎസ് ചിത്ര രാമക്ഷേത്ര പ്രതിഷ്ഠയെ സ്വാഗതം ചെയ്തതിനെതിരെ സോഷ്യലിടത്ത് രൂക്ഷ പ്രതികരണങ്ങളാണ് നിറയുന്നത്. രാമമന്ത്രം ജപിച്ചും അഞ്ച്തിരിയിട്ട വിളക്ക് തെളിയിച്ചും രാമ ക്ഷേത്ര പ്രതിഷ്ഠാദിനത്തെ സ്വാഗതം ചെയ്യണമെന്നായിരുന്നു ചിത്ര വീഡിയോയിലെത്തി പറഞ്ഞിരുന്നത്. അതേസമയം ചിത്രയെ വിമര്‍ശിച്ചെത്തിയിരിക്കുകയാണ് ഗായകന്‍ സൂരജ് സന്തോഷ്.

പള്ളി പൊളിച്ചാണ് അമ്പലം പണിതതെന്ന വസ്തുത സൗകര്യപൂര്‍വം മറക്കുന്നുവെന്നും എത്ര എത്ര കെഎസ് ചിത്രമാര്‍ തനി സ്വരൂപം കാട്ടാന്‍ ഇരിക്കുന്നുവെന്നും സൂരജ് പറയുന്നു. ഹൈലൈറ്റ് എന്താണെന്ന് വെച്ചാല്‍, സൗകര്യപൂര്‍വം ചരിത്രം മറന്നുകൊണ്ട്, പള്ളി പൊളിച്ചാണ് അമ്പലം പണിതതെന്ന വസ്തുത സൈഡിലേക്ക് മാറ്റി വച്ചിട്ട് ലോകാ സമസ്ത സുഖിനോ ഭവന്തുന്നൊക്കെ പറയുന്ന ആ നിഷ്‌കളങ്കതയാണ്. വിഗ്രഹങ്ങള്‍ ഇനി എത്ര ഉടയാന്‍ കിടക്കുന്നു ഓരോന്നായ്. എത്ര എത്ര കെ. എസ് ചിത്രമാര്‍ തനി സ്വരൂപം കാട്ടാന്‍ ഇരിക്കുന്നു. കഷ്ടം, പരമ കഷ്ടം,’ എന്നായിരുന്നു സൂരജ് ഇന്‍സ്റ്റാഗ്രം സ്റ്റോറിയില്‍ കുറിച്ചത്.

‘അയോധ്യ രാമക്ഷേത്രത്തിന്റെ പ്രതിഷ്ഠാദിനമായ ജനുവരി 22ന് എല്ലാവരും ഉച്ചയ്ക്ക് 12, 20ന് ശ്രീരാമ ജയരാമ’എന്ന് രാമമന്ത്രം ജപിച്ചു കൊണ്ടിരിക്കണം. അതുപോലെ വൈകുന്നേരം അഞ്ച് തിരിയുള്ള വിളക്ക് വീടിന്റെ നാനാ ഭാഗത്തും തെളിക്കണം. ഭഗവാന്റെ അനുഗ്രഹം എല്ലാവര്‍ക്കും ഉണ്ടാകട്ടെ എന്ന് പരിപൂര്‍ണമായി പ്രാര്‍ത്ഥിക്കുന്നു. ലോകാ സമസ്താ സുഖിനോ ഭവന്തു’ എന്നാണ് ചിത്ര വീഡിയോയില്‍ പറയുന്നത്. കഴിഞ്ഞ ദിവസം ചിത്രം അയോധ്യയില്‍ നിന്നുള്ള അക്ഷതവും സ്വീകരിച്ചിരുന്നു.