ബോളിവുഡിന്റെ ബിഗ് ബിയ്ക്കിന്ന് എണ്‍പതാം ജന്മദിനമാണ്. ആരാധകര്‍ വലിയ രീതിയില്‍ തന്നെ അമിതാഭ് ബച്ചന്റെ ജന്മദിനം ആഘോഷിക്കുന്നുണ്ട്. ബച്ചന്റെ വലിയ ആരാധികയാണ് നടി ശ്വേതാ മേനോന്‍. അദ്ദേഹത്തെ വിവാഹം കഴിക്കാന്‍ തനിക്ക് ആഗ്രഹമുണ്ടായിരുന്നെന്ന് തുറന്ന് പറഞ്ഞിരിക്കുകയാണ് ശ്വേതാ മേനോന്‍.
ചെറിയ പ്രായത്തില്‍ ബിഗ് ബിയോട് തോന്നിയ ഇഷ്ടമാണെങ്കിലും ആദ്യമായി നേരില്‍ കണ്ടപ്പോള്‍ തന്നെ അദ്ദേഹത്തോട് ഇക്കാര്യം പറഞ്ഞിരുന്നെന്ന് ശ്വേതാ മേനോന്‍ പറയുന്നു. എന്നെ അല്ലാതെ വേറെ ആരെയും വിവാഹം കഴിക്കരുതെന്നും അദ്ദേഹത്തോട് പറഞ്ഞിരുന്നെന്നും ഇപ്പോള്‍ അതെല്ലാം മണ്ടത്തരമായി തോന്നുന്നുണ്ടെന്നും ശ്വേത മേനോന്‍ പറഞ്ഞു.
ശ്വേതയുടെ അച്ഛന് എയര്‍ഫോഴ്സിലായിരുന്നു. ഒന്‍പതോ പത്തോ വയസിലെ കാര്യമാണ്. അലഹബാദ് എന്ന സ്ഥലത്തായിരുന്നു അന്ന്. ഇന്ദിര ഗാന്ധി മരണപ്പെട്ട സമയം, അവരുടെ മകന്‍ രാജീവ് ഗാന്ധിയും നടന്‍ അമിതാഭ് ബച്ചനും ഇന്ദിര ഗാന്ധിയുടെ ചിതാഭസ്മം നിമജ്ജനം ചെയ്യാനായി അലഹബാദിലേക്ക് വരുന്നുണ്ടായിരുന്നു.
അന്ന് അച്ഛന് അവിടെയായിരുന്നു ഡ്യൂട്ടി. നാളെ എമര്‍ജന്‍സി ഡ്യൂട്ടിയാണെന്നും അമിതാഭ് ബച്ചനും രാജീവ് ഗാന്ധിയും വരുന്നുണ്ടെന്നും തലേദിവസം തന്നെ അച്ഛന് പറഞ്ഞിരുന്നെന്ന് ശ്വേത പറയുന്നു.
എനിക്ക് അമിതാഭ് ബച്ചനെ കാണണമെന്ന് ഞാന്‍ അച്ഛനോട് പറഞ്ഞെങ്കിലും അദ്ദേഹം അത് നിരസിക്കുകയായിരുന്നു. ഞാനത് വിട്ടെന്നാണ് അച്ഛന് കരുതിയത്. പിറ്റേ ദിവസം അച്ഛന് നേരത്തെ പോവുകയും ചെയ്തു.
ഇന്നാണല്ലോ ബിഗ്ബി വരുന്ന ദിവസം എന്നോര്‍ത്ത് ഞാന്‍ ഉറക്കത്തില്‍ നിന്നും ചാടി എഴുന്നേറ്റു. എയര്‍ഫോഴ്സ് ഏരിയയിലാണ് ഞങ്ങളന്ന് താമസിക്കുന്നത്. ഉറക്കത്തില്‍ നിന്നും എഴുന്നേറ്റ ഞാന്‍ ഷിമ്മീസാണ് ഇട്ടിരുന്നത്. ആ വേഷത്തില്‍ പല്ല് പോലും തേക്കാതെ ഇറങ്ങി ഒരോട്ടം കൊടുത്തു. നേരെ അവരുടെ അടുത്തേക്ക് എത്തി.
ബച്ചന്റെ അടുത്ത് ചെന്ന് നിന്ന് ഞാന്‍ പറഞ്ഞു, ‘അമിതാങ്കിള്‍ അമിതാങ്കിള്‍ നിങ്ങള്‍ എന്നെ വിവാഹം കഴിക്കാമോ?, കാരണം ഞാന്‍ നിങ്ങളെ ഇഷ്ടപ്പെടുന്നുണ്ട്. എന്നെ മാത്രമേ വിവാഹം കഴിക്കാന്‍ പാടുള്ളു, വേറെ ആരെയും വിവാഹം കഴിക്കരുത്’, എന്ന് താന്‍ പറഞ്ഞെന്ന് ശ്വേതാ മേനോന്‍ പറയുന്നു.
അവര്‍ വളരെ സീരിയസായിട്ടുള്ള കാര്യത്തിന് വന്ന് നില്‍ക്കുന്നതാണ്. ആ സമയത്താണ് ഞാനീ മണ്ടത്തരം പറയുന്നത്. അച്ഛന് എന്റെ വര്‍ത്തമാനം കേട്ട് വളരെ സീരിയസായി കണ്ണും തുറിച്ച് നോക്കുന്നുണ്ട്. ചിലപ്പോള്‍ അച്ഛനും പണിഷ്മെന്റ് കിട്ടുന്ന കാര്യമാണ്. പക്ഷേ അപ്പോ തന്നെ ഒരു ഓഫീസര്‍ എന്നെ നിമിഷനേരം കൊണ്ട് എന്നെ അവിടെ നിന്നും മാറ്റി. എന്നാല്‍ വീട്ടിലെത്തിയ ശേഷം അതേപ്പറ്റി അച്ഛന് എന്നോട് ഒന്നും ചോദിച്ചില്ല. തനിക്കും അടിയും കിട്ടിയില്ലെന്നും ശ്വേത പറഞ്ഞു.
