ഐപിഎല്ലിൽ റോയൽ ചലഞ്ചേഴ്സിനെതിരായ തോൽവിയിൽ പ്രതികരണവുമായി രാജസ്ഥാൻ റോയൽസ് നായകൻ റിയാൻ പരാഗ്. ഞങ്ങൾ നന്നായി പന്തെറിഞ്ഞു. ബെംഗളൂരുവിലെ ചിന്നസ്വാമിയിലെ പിച്ചിൽ 210-215 റൺസ് അടിക്കാൻ കഴിയുമായിരുന്നു. അതിൽ നിന്നും റോയൽ ചലഞ്ചേഴ്സിനെ തടയാൻ രാജസ്ഥാൻ ബൗളർമാർക്ക് കഴിഞ്ഞു. രണ്ടാം ഇന്നിങ്സിന്റെ പകുതി പിന്നിടുമ്പോൾ രാജസ്ഥാന് മത്സരത്തിൽ വ്യക്തമായ മുൻതൂക്കമുണ്ടായിരുന്നു. അവിടെ നിന്നും മത്സരം തോറ്റതിന്റെ കാരണം രാജസ്ഥാൻ താരങ്ങൾ തന്നെയാണ്.’ റിയാൻ പരാഗ് മത്സരശേഷം പ്രതികരിച്ചു.
സ്പിന്നർമാർക്കെതിരെ രാജസ്ഥാൻ ബാറ്റർമാർ നന്നായി കളിച്ചില്ല. ടീം മാനേജ്മെന്റ് താരങ്ങൾക്ക് വലിയ പിന്തുണയാണ് നൽകുന്നത്. എന്നാൽ പിന്തുണയ്ക്ക് താരങ്ങൾ ഉത്തരവാദിത്തതോടെ പെരുമാറണം. ഐപിഎൽ പോലൊരു ടൂർണമെൻ്റിൽ ചെറിയൊരു തെറ്റ് സംഭവിച്ചാൽ പോലും അതിന് വില നൽകേണ്ടിവരും. ഈ സാഹചര്യങ്ങളെക്കുറിച്ച് രാജസ്ഥാൻ താരങ്ങൾ പരസ്പരം സംസാരിക്കും എന്നും പരാഗ് പറയുന്നു.
അതേസമയം, ഐപിഎല്ലിൽ റോയൽ ചലഞ്ചേഴ്സ് ബെംഗളൂരുവിനോട് 11 റൺസിനാണ് രാജസ്ഥാൻ റോയൽസ് പരാജയപ്പെട്ടത്. മത്സരത്തിൽ ആദ്യം ബാറ്റ് ചെയ്ത റോയൽ ചലഞ്ചേഴ്സ് നിശ്ചിത 20 ഓവറിൽ അഞ്ച് വിക്കറ്റ് നഷ്ടത്തിൽ 205 റൺസെടുത്തു. മറുപടി ബാറ്റിങ്ങിൽ 20 ഓവർ പൂർത്തിയാകുമ്പോൾ രാജസ്ഥാന് ഒമ്പത് വിക്കറ്റ് നഷ്ടത്തിൽ 194 റൺസെടുക്കാനെ സാധിച്ചുള്ളു.
