1990-കളിലെ മലയാള സിനിമയിലെ എക്കാലത്തെയും വലിയ വിജയങ്ങളിലൊന്നായ ‘സമ്മർ ഇൻ ബത്ലഹേം’ 27 വർഷങ്ങൾക്കുശേഷം 4K ദൃശ്യമികവിൽ തിയറ്ററുകളിലേക്ക് തിരിച്ചെത്തുന്നു. റീ-റിലീസിന്റെ പ്രഖ്യാപനം മുതൽ പ്രേക്ഷകർ കാത്തിരുന്ന ചിത്രത്തിന്റെ ഔദ്യോഗിക ട്രെയിലർ പുറത്തിറങ്ങി.
രവിശങ്കർ, ഡെന്നീസ്, ആമി, നിരഞ്ജൻ, മോനായി തുടങ്ങി മലയാളികൾ നെഞ്ചിലേറ്റിയ കഥാപാത്രങ്ങളെ അതേ മായാത്ത ഭംഗിയോടെ വീണ്ടും കാണാനുള്ള ആവേശത്തിലാണ് സിനിമാസ്വാദകർ. എസ്.ബി. മലയിൽ – രഞ്ജിത്ത് കൂട്ടുകെട്ടിൽ പിറന്ന ഈ ചിത്രം ഡിസംബർ 12-ന് തിയറ്ററുകളിൽ എത്തുമെന്നാണ് പുതിയ റിപ്പോർട്ടുകൾ.
മഞ്ജു വാര്യർ, സുരേഷ് ഗോപി, ജയറാം എന്നിവർ കേന്ദ്ര കഥാപാത്രങ്ങളെ അവതരിപ്പിച്ച ഈ കുടുംബ ചിത്രം, മലയാളത്തിന്റെ സൂപ്പർ സ്റ്റാർ മോഹൻലാലിന്റെ അവിസ്മരണീയമായ അതിഥി വേഷംകൊണ്ടും ശ്രദ്ധ നേടിയിരുന്നു. ദിവംഗതനായ കലാഭവൻ മണിയുടെ പ്രകടനവും സിനിമയുടെ ഹൈലൈറ്റായിരുന്നു.
വിദ്യാസാഗറിന്റെ മനോഹരമായ സംഗീതവും ഗിരീഷ് പുത്തഞ്ചേരിയുടെ വരികളും സിനിമയുടെ റീ-റിലീസിലും പ്രധാന ആകർഷണമാകും. ‘ദേവദൂതൻ’, ‘ഛോട്ടാ മുംബൈ’ എന്നീ സിനിമകൾക്ക് ശേഷം ഹൈ സ്റ്റുഡിയോസിന്റെ നേതൃത്വത്തിലാണ് ‘സമ്മർ ഇൻ ബത്ലഹേം’ 4K നിലവാരത്തിലേക്ക് റീമാസ്റ്റർ ചെയ്തത്.
സിയാദ് കോക്കർ നിർമ്മിച്ച ഈ എവർഗ്രീൻ ഹിറ്റ് ചിത്രം വീണ്ടും ബിഗ് സ്ക്രീനിൽ കാണാനുള്ള കാത്തിരിപ്പിലാണ് ആരാധകർ.
