കൊച്ചി: മലയാള സിനിമയിലെ എക്കാലത്തെയും വലിയ വിജയങ്ങളിലൊന്നായ ‘ഉദയനാണ് താരം’ വീണ്ടും വെള്ളിത്തിരയിലേക്ക്. 2005-ൽ തിയേറ്ററുകളെ ആവേശം കൊള്ളിച്ച ഈ സൂപ്പർഹിറ്റ് ചിത്രം, 20 വർഷങ്ങൾക്ക് ശേഷം പുത്തൻ സാങ്കേതിക മികവോടെയാണ് റീ-റിലീസ് ചെയ്യുന്നത്. 4K ദൃശ്യമികവിലും ഡോൾബി അറ്റ്മോസ് ശബ്ദ സംവിധാനത്തിലും ഒരുങ്ങുന്ന ചിത്രം 2026 ജനുവരി അവസാനത്തോടെ തിയേറ്ററുകളിൽ എത്തുമെന്ന് അണിയറ പ്രവർത്തകർ അറിയിച്ചു.
സംവിധായകൻ റോഷൻ ആൻഡ്രൂസിന്റെ അരങ്ങേറ്റ ചിത്രമായിരുന്നു ‘ഉദയനാണ് താരം’. സിനിമയ്ക്കുള്ളിലെ സിനിമയുടെ കഥ പറഞ്ഞ ഈ ചിത്രം മലയാളികൾക്ക് സമ്മാനിച്ചത് മറക്കാനാവാത്ത നിരവധി മുഹൂർത്തങ്ങളാണ്. ഉദയഭാനുവായി മോഹൻലാലും സരോജ് കുമാർ എന്ന രാജപ്പനായി ശ്രീനിവാസനും തകർത്തഭിനയിച്ച ചിത്രം, ഇന്നും പ്രേക്ഷകർക്കിടയിൽ വലിയ ചർച്ചാവിഷയമാണ്.
ശ്രീനിവാസൻ തന്നെ തിരക്കഥയൊരുക്കിയ ഈ ചിത്രത്തിൽ മീനയായിരുന്നു നായിക. ജഗതി ശ്രീകുമാറിന്റെ ‘പച്ചാളം ഭാസി’ എന്ന കഥാപാത്രവും മുകേഷ്, സലിം കുമാർ തുടങ്ങിയവരുടെ പ്രകടനങ്ങളും ഇന്നും മലയാളികളുടെ പ്രിയപ്പെട്ടതാണ്. ദീപക് ദേവ് ഒരുക്കിയ ഗാനങ്ങൾ പുതിയ രൂപത്തിൽ വീണ്ടും കേൾക്കാനാകും എന്നതും ആരാധകർക്ക് ആവേശം നൽകുന്നു.
കാൾട്ടൺ ഫിലിംസിനു വേണ്ടി സി. കരുണാകരൻ നിർമ്മിച്ച ഈ ചിത്രം ന്യൂ സൂര്യ ഫിലിംസാണ് വീണ്ടും വിതരണത്തിനെത്തിക്കുന്നത്. നേരത്തെ ‘സ്ഫടികം’, ‘മണിച്ചിത്രത്താഴ്’, ‘ദേവദൂതൻ’ തുടങ്ങിയ ചിത്രങ്ങൾ റീ-റിലീസ് ചെയ്ത് വൻ വിജയം നേടിയതിന് പിന്നാലെ ഉദയഭാനുവിന്റെ തിരിച്ചുവരവും ബോക്സ് ഓഫീസിൽ തരംഗമാകുമെന്നാണ് പ്രതീക്ഷിക്കുന്നത്.
