കൊച്ചി: മലയാള സിനിമയിൽ പുതിയൊരു ദൃശ്യാനുഭവം സമ്മാനിക്കാൻ ഒരുങ്ങുന്ന ‘ഐ, നോബഡി’ (I, Nobody) എന്ന ചിത്രത്തെക്കുറിച്ച് പ്രതീക്ഷകൾ പങ്കുവെച്ച് നടി പാർവതി തിരുവോത്ത്. പൃഥ്വിരാജ് സുകുമാരനും പാർവതിയും വീണ്ടും ഒന്നിക്കുന്ന ഈ ചിത്രം, മലയാളികൾ ഇതുവരെ പരീക്ഷിക്കാത്ത തികച്ചും വ്യത്യസ്തമായ ഒരു മേക്കിങ് ശൈലിയാണ് പിന്തുടരുന്നതെന്ന് താരം വെളിപ്പെടുത്തി.
സോഷ്യൽ കമന്ററിക്ക് അപ്പുറം സിനിമയുടെ പ്രമേയത്തെക്കുറിച്ച് കൂടുതൽ കാര്യങ്ങൾ പാർവതി പങ്കുവെച്ചു. “ഇതൊരു സോഷ്യൽ കമന്ററി എന്ന് പറയാമെങ്കിലും അതിനേക്കാൾ എത്രയോ മുകളിലാണ് ചിത്രത്തിന്റെ ലെയറുകൾ. നമ്മൾ ഇതുവരെ മലയാള സിനിമയിൽ കണ്ടിട്ടില്ലാത്ത വിധത്തിലുള്ള ഒരു ചിത്രീകരണ രീതിയാണിതിൽ ഉപയോഗിച്ചിരിക്കുന്നത്,” പാർവതി പറഞ്ഞു. ചിത്രത്തിലെ തന്റെ ഭാഗങ്ങളുടെ ഷൂട്ടിംഗ് പൂർത്തിയായെന്നും താരം അറിയിച്ചു.
നിസാം ബഷീറിന്റെ മാജിക് ‘കെട്ട്യോളാണ് എന്റെ മാലാഖ’, ‘റോഷാക്ക്’ എന്നീ ചിത്രങ്ങളിലൂടെ ശ്രദ്ധേയനായ നിസാം ബഷീറാണ് ഈ പരീക്ഷണാത്മക ചിത്രം സംവിധാനം ചെയ്യുന്നത്. റോഷാക്കിന് ശേഷം നിസാം ഒരുക്കുന്ന ചിത്രം എന്ന നിലയിൽ വലിയ ആകാംക്ഷയിലാണ് സിനിമാ പ്രേമികൾ. പൃഥ്വിരാജ് പ്രൊഡക്ഷൻസും ഇ4 എന്റർടൈൻമെന്റും ചേർന്നാണ് സിനിമ നിർമ്മിക്കുന്നത്.
താരനിരയും അണിയറ പ്രവർത്തകരും അശോകൻ, മധുപാൽ, ഹക്കിം ഷാജഹാൻ, ലുക്മാൻ അവറാൻ, വിനയ് ഫോർട്ട്, ഗണപതി തുടങ്ങിയ വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്. ‘അർജുൻ റെഡ്ഡി’, ‘അനിമൽ’ എന്നീ സിനിമകളിലൂടെ ലോകശ്രദ്ധ നേടിയ ഹർഷവർധൻ രാമേശ്വറാണ് ചിത്രത്തിന്റെ സംഗീതം നിർവ്വഹിക്കുന്നത്. ദിനേശ് പുരുഷോത്തമനാണ് ഛായാഗ്രഹണം.
‘എന്ന് നിന്റെ മൊയ്തീൻ’, ‘കൂടെ’ എന്നീ ചിത്രങ്ങൾക്ക് ശേഷം പൃഥ്വിരാജ്-പാർവതി കൂട്ടുക്കെട്ട് വീണ്ടും ഒന്നിക്കുമ്പോൾ, അത് മലയാള സിനിമയിലെ മറ്റൊരു നാഴികക്കല്ലായി മാറുമെന്നാണ് വിലയിരുത്തപ്പെടുന്നത്. നിലവിൽ ചിത്രത്തിന്റെ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്.
