മലയാളത്തിലൂടെ സിനിമാലോകത്തെത്തി തെന്നിന്ത്യയും ബോളിവുഡും കീഴടക്കിയ നടി അസിനും മൈക്രോമാക്സ് സഹസ്ഥാപകൻ രാഹുൽ ശർമയും തങ്ങളുടെ പത്താം വിവാഹവാർഷികത്തിന്റെ നിറവിലാണ്. 2016-ൽ വിവാഹിതരായ ഇരുവരും ഇന്ന് തങ്ങളുടെ ദാമ്പത്യ ജീവിതത്തിലെ സുപ്രധാനമായ ഒരു നാഴികക്കല്ല് പിന്നിട്ടിരിക്കുകയാണ്. വാർഷിക വേളയിൽ അസിനൊപ്പമുള്ള ചില അപൂർവ ചിത്രങ്ങൾ രാഹുൽ ശർമ സമൂഹമാധ്യമങ്ങളിൽ പങ്കുവെച്ചത് ആരാധകർക്കിടയിൽ വലിയ ചർച്ചയായിട്ടുണ്ട്.
തന്റെ ജീവിതത്തിലെ എല്ലാ വിജയങ്ങൾക്കും പിന്നിലെ ചാലകശക്തി അസിനാണെന്നാണ് രാഹുൽ തന്റെ കുറിപ്പിൽ വിശേഷിപ്പിച്ചത്. “ആനന്ദഭരിതമായ പത്ത് വർഷങ്ങൾ! എന്റെ ജീവിതത്തിലെ എല്ലാ നേട്ടങ്ങളുടെയും പാതി അവകാശിയാണ് അവൾ. അവളുടെ ജീവിതയാത്രയിൽ ഒരു സഹതാരമായിരിക്കാൻ കഴിഞ്ഞത് എന്റെ വലിയ ഭാഗ്യമാണ്,” എന്ന് അദ്ദേഹം കുറിച്ചു. വിവാഹദിനത്തിലെ തമാശ നിറഞ്ഞ നിമിഷങ്ങളും ഇരുവരും ഒന്നിച്ചുള്ള സ്വകാര്യ ചിത്രങ്ങളുമാണ് അദ്ദേഹം എക്സ് (ട്വിറ്റർ) പ്ലാറ്റ്ഫോമിലൂടെ പങ്കുവെച്ചത്.
ബോളിവുഡ് താരം അക്ഷയ് കുമാറാണ് ഈ പ്രണയകഥയിലെ പ്രധാനി എന്നതും ശ്രദ്ധേയമാണ്. ‘ഹൗസ്ഫുൾ 2’ എന്ന ചിത്രത്തിന്റെ ഷൂട്ടിംഗിനിടെ അക്ഷയ് ആണ് ഇരുവരെയും പരിചയപ്പെടുത്തിയത്. പിന്നീട് ആ സൗഹൃദം പ്രണയത്തിലേക്കും വിവാഹത്തിലേക്കും വഴിമാറുകയായിരുന്നു. ഏകദേശം നാല് വർഷത്തോളം ഇവരുടെ ബന്ധം രഹസ്യമായി സൂക്ഷിക്കാൻ സഹായിച്ചതും അക്ഷയ് കുമാർ തന്നെയായിരുന്നു.
2016 ജനുവരിയിൽ വിവാഹിതയായ ശേഷം അസിൻ സിനിമാരംഗത്ത് നിന്ന് പൂർണ്ണമായും വിട്ടുനിൽക്കുകയാണ്. 2015-ൽ പുറത്തിറങ്ങിയ ‘ഓൾ ഈസ് വെൽ’ ആയിരുന്നു താരത്തിന്റെ അവസാന ചിത്രം. നിലവിൽ കുടുംബത്തോടൊപ്പം സമയം ചിലവഴിക്കുന്നതിലാണ് അസിൻ ശ്രദ്ധ കേന്ദ്രീകരിക്കുന്നത്. ഇവർക്ക് ‘ആരിൻ റയ്ൻ’ എന്നൊരു മകളുണ്ട്. പൊതുവേദികളിലോ സോഷ്യൽ മീഡിയയിലോ അസിൻ അധികം പ്രത്യക്ഷപ്പെടാറില്ലാത്തതിനാൽ, രാഹുൽ പങ്കുവെച്ച ഈ ചിത്രങ്ങൾ ആരാധകർക്ക് വലിയൊരു സർപ്രൈസ് ആയി മാറി.
മകളുടെ വിശേഷങ്ങളും കുടുംബചിത്രങ്ങളും അപൂർവമായി മാത്രമേ ഇവർ പുറത്തുവിടാറുള്ളൂ. ഒരു സ്റ്റാർട്ടപ്പ് കമ്പനിയെ നയിക്കുന്ന അതേ കരുത്തോടെ തന്റെ വീടിനെയും ഹൃദയത്തെയും നയിക്കുന്ന അസിന്, വരാനിരിക്കുന്ന മനോഹരമായ ഭാവി ആശംസിച്ചുകൊണ്ടാണ് രാഹുൽ കുറിപ്പ് അവസാനിപ്പിച്ചത്.
