കൊച്ചി: ജി സിനിമാസിന്റെ ബാനറിൽ ജീമോൻ ജോർജ് നിർമിക്കുന്ന പുതിയ ചിത്രം ‘ശുക്രൻ’ റിലീസിന് തയ്യാറെടുക്കുന്നു. ബിബിൻ ജോർജ്, ഷൈൻ ടോം ചാക്കോ, ചന്ദുനാഥ് എന്നിവരെ പ്രധാന കഥാപാത്രങ്ങളാക്കി ഒരുങ്ങുന്ന ഈ ചിത്രം ഒരു റൊമാന്റിക് കോമഡി ത്രില്ലറാണ്.
അമേരിക്കൻ മലയാളി സമൂഹത്തിൽ സജീവ സാന്നിധ്യമായ ജീമോൻ ജോർജ്, തൊണ്ണൂറുകളുടെ തുടക്കം മുതൽ തന്നെ കലാരംഗത്ത് സജീവമാണ്. പ്രമുഖ താരങ്ങളെ അണിനിരത്തി അമേരിക്കയിൽ നിരവധി സ്റ്റാർ നൈറ്റുകളും മെഗാ ഷോകളും വിജയകരമായി സംഘടിപ്പിച്ച അദ്ദേഹം, പ്രവാസികൾക്കിടയിൽ മലയാള സിനിമയുടെ പ്രദർശനം വ്യാപിപ്പിക്കുന്നതിലും നിർണായക പങ്കുവഹിച്ചിട്ടുണ്ട്. നീണ്ട വർഷത്തെ ഈ പ്രവൃത്തിപരിചയവുമായാണ് അദ്ദേഹം ഇപ്പോൾ നിർമ്മാണ രംഗത്തേക്ക് ചുവടുവെക്കുന്നത്.
യുവതാരങ്ങൾക്കൊപ്പം മറ്റ് പ്രമുഖ നടീനടന്മാരും അണിനിരക്കുന്ന ‘ശുക്രൻ’, ഇതിനോടകം തന്നെ സിനിമാ പ്രേമികൾക്കിടയിൽ വലിയ താൽപ്പര്യം ജനിപ്പിച്ചിട്ടുണ്ട്. ചിത്രത്തിന്റെ അവസാനഘട്ട ജോലികൾ പുരോഗമിച്ചുവരികയാണ്. ജി സിനിമാസിന്റെ റിലീസിനൊരുങ്ങുന്ന ആദ്യ പ്രോജക്റ്റാണിത്. കൂടാതെ, മറ്റ് ബിഗ് ബജറ്റ് ചിത്രങ്ങളെക്കുറിച്ചുള്ള ചർച്ചകളും അണിയറയിൽ സജീവമാണെന്ന് നിർമ്മാണ വിഭാഗം അറിയിച്ചു. ഉടൻ തന്നെ പുതിയ സിനിമകളെക്കുറിച്ചുള്ള ഔദ്യോഗിക പ്രഖ്യാപനമുണ്ടാകുമെന്നാണ് സൂചന.
