മലയാള സിനിമ ആകാംക്ഷയോടെ കാത്തിരിക്കുന്ന മമ്മൂട്ടി-മോഹൻലാൽ ചിത്രം ‘പേട്രിയറ്റി’ന്റെ ട്രെയിലർ സെൻസറിങ് പൂർത്തിയായി. സെൻസർ ബോർഡിൽ നിന്നും ‘UA 13+’ സർട്ടിഫിക്കറ്റാണ് ട്രെയിലറിന് ലഭിച്ചിരിക്കുന്നത്. 3 മിനിറ്റ് 29 സെക്കൻഡ് ദൈർഘ്യമുള്ള ട്രെയിലർ ഉടൻ തന്നെ പ്രേക്ഷകരിലേക്ക് എത്തുമെന്നാണ് റിപ്പോർട്ടുകൾ സൂചിപ്പിക്കുന്നത്. 18 വർഷത്തെ ഇടവേളയ്ക്ക് ശേഷം മലയാളത്തിന്റെ മഹാനടന്മാർ ഒന്നിക്കുന്ന ഈ ചിത്രം മഹേഷ് നാരായണനാണ് സംവിധാനം ചെയ്യുന്നത്.
മലയാള സിനിമയിൽ ഇന്നേവരെ കണ്ടിട്ടില്ലാത്തത്ര വലിയ ക്യാൻവാസിലാണ് ഒരു അന്താരാഷ്ട്ര സ്പൈ ത്രില്ലറായി ‘പേട്രിയറ്റ്’ ഒരുങ്ങുന്നത്. ഇന്ത്യ, ശ്രീലങ്ക, യുകെ, അസർബൈജാൻ, യുഎഇ തുടങ്ങി പത്തിലധികം രാജ്യങ്ങളിലായി പടർന്നു കിടക്കുന്ന ലൊക്കേഷനുകളിലാണ് ചിത്രീകരണം പൂർത്തിയാക്കിയത്. മമ്മൂട്ടി, മോഹൻലാൽ എന്നിവർക്കൊപ്പം ഫഹദ് ഫാസിൽ, കുഞ്ചാക്കോ ബോബൻ, നയൻതാര തുടങ്ങി വമ്പൻ താരനിരയാണ് ഈ ബിഗ് ബജറ്റ് ചിത്രത്തിൽ അണിനിരക്കുന്നത്.
ആന്റോ ജോസഫ് ഫിലിം കമ്പനിയും കിച്ചപ്പു ഫിലിംസും ചേർന്ന് നിർമ്മിക്കുന്ന ചിത്രം 2026 ഏപ്രിൽ 23-ന് ലോകമെമ്പാടുമുള്ള തീയേറ്ററുകളിൽ റിലീസ് ചെയ്യും. സിനിമയുടെ ഡബ്ബിങ് ജോലികൾ പൂർത്തിയാക്കി പോസ്റ്റ് പ്രൊഡക്ഷൻ ഘട്ടത്തിലാണ് ഇപ്പോൾ ചിത്രം. സുഷിൻ ശ്യാം സംഗീതവും മനുഷ് നന്ദൻ ഛായാഗ്രഹണവും നിർവ്വഹിക്കുന്ന ഈ ചിത്രം സാങ്കേതികമായി മലയാള സിനിമയ്ക്ക് ഒരു പുതിയ വിപ്ലവം തന്നെയായിരിക്കും സമ്മാനിക്കുകയെന്നാണ് സിനിമാ ലോകത്തെ വിലയിരുത്തലുകൾ.
