ഐപിഎൽ 2026 സീസൺ ആരംഭിക്കാൻ ദിവസങ്ങൾ മാത്രം ബാക്കിനിൽക്കെ ചെന്നൈ സൂപ്പർ കിംഗ്സിന് കനത്ത തിരിച്ചടി. കാലിന് പരിക്കേറ്റതിനെത്തുടർന്ന് (Calf Strain) സൂപ്പർ താരം എം.എസ്. ധോണിക്ക് സീസണിലെ ആദ്യ രണ്ടാഴ്ചത്തെ മത്സരങ്ങൾ നഷ്ടമാകുമെന്ന് ചെന്നൈ സൂപ്പർ കിംഗ്സ് ഔദ്യോഗികമായി സ്ഥിരീകരിച്ചു. ശനിയാഴ്ച പുറത്തിറക്കിയ വാർത്താക്കുറിപ്പിലൂടെയാണ് ഫ്രാഞ്ചൈസി ഇക്കാര്യം അറിയിച്ചത്. നിലവിൽ ധോണി വിദഗ്ധ ചികിത്സയ്ക്കും പുനരധിവാസത്തിനുമായി (Rehabilitation) മാറിനിൽക്കുകയാണ്.
ധോണിയുടെ അഭാവത്തിൽ ടീമിലെ പുതിയ അംഗമായ സഞ്ജു സാംസൺ ചെന്നൈയുടെ വിക്കറ്റ് കീപ്പർ ഗ്ലൗസ് അണിയും. ഈ സീസണിലെ ട്രേഡിംഗിലൂടെയാണ് സഞ്ജു രാജസ്ഥാൻ റോയൽസിൽ നിന്ന് ചെന്നൈയിൽ എത്തിയത്. മാർച്ച് 30-ന് ഗുവാഹത്തിയിൽ രാജസ്ഥാൻ റോയൽസിനെതിരെ നടക്കുന്ന ചെന്നൈയുടെ ആദ്യ മത്സരത്തിൽ സഞ്ജു തന്നെയാകും വിക്കറ്റ് കാക്കുക. ഋതുരാജ് ഗെയ്ക്വാദ് നയിക്കുന്ന ടീമിൽ വിക്കറ്റ് കീപ്പിംഗിന് പുറമെ ബാറ്റിംഗിലും സഞ്ജുവിന് നിർണ്ണായക ചുമതലകളുണ്ടാകും.
44-കാരനായ ധോണിക്ക് പരിശീലനത്തിനിടെയാണ് പരിക്കേറ്റത്. അദ്ദേഹം മുടന്തി നടന്നുപോകുന്ന വീഡിയോ നേരത്തെ സോഷ്യൽ മീഡിയയിൽ വൈറലായിരുന്നു. പരിക്കിൽ നിന്ന് മുക്തനായാൽ ഏപ്രിൽ മൂന്നാം വാരത്തോടെ ധോണി ടീമിലേക്ക് തിരിച്ചെത്തുമെന്നാണ് പ്രതീക്ഷിക്കുന്നത്. അതുവരെ സഞ്ജു സാംസൺ വിക്കറ്റ് കീപ്പിംഗ് ചുമതലകൾ വഹിക്കുമെന്ന് ഉറപ്പായിട്ടുണ്ട്. സഞ്ജു ചെന്നൈക്കായി ഇന്നിംഗ്സ് ഓപ്പൺ ചെയ്തേക്കുമെന്നും സൂചനകളുണ്ട്.
