‘ന്നാ താൻ കേസ് കൊട്’ എന്ന സൂപ്പർ ഹിറ്റ് ചിത്രത്തിന് ശേഷം കുഞ്ചാക്കോ ബോബനും സംവിധായകൻ രതീഷ് ബാലകൃഷ്ണൻ പൊതുവാളും വീണ്ടും ഒന്നിക്കുന്ന ‘ഒരു ദുരൂഹ സാഹചര്യത്തിൽ’ ഏപ്രിൽ 15-ന് വിഷു റിലീസായി തിയേറ്ററുകളിലെത്തുന്നു. പ്രേക്ഷകരിൽ വലിയ ആകാംക്ഷ ഉണർത്തിക്കൊണ്ട് ചിത്രത്തിന്റെ ട്രെയിലർ ഇതിനോടകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു. പേര് സൂചിപ്പിക്കുന്നത് പോലെ തന്നെ സിനിമയുടെ കഥയെക്കുറിച്ച് യാതൊരു സൂചനയും നൽകാതെ ഏറെ ദുരൂഹതകൾ നിറച്ചാണ് ട്രെയിലർ ഒരുക്കിയിരിക്കുന്നത്.
വയനാട്ടിലെ തോൽപ്പെട്ടിയിലുള്ള ജനകീയ ആരോഗ്യ കേന്ദ്രത്തിലെ ജീവനക്കാരനായ ‘സേതു’ എന്ന കഥാപാത്രമായാണ് കുഞ്ചാക്കോ ബോബൻ ഈ ചിത്രത്തിൽ എത്തുന്നത്. റേഡിയോയുടെ സ്ഥിരം ശ്രോതാവായ സേതുവിലൂടെ കഥ എങ്ങനെ ഒരു മിസ്റ്ററിയിലേക്ക് വഴിമാറുന്നു എന്നതാണ് ചിത്രത്തിന്റെ പ്രധാന ആകർഷണം. തമാശയും പ്രണയവും ത്രില്ലറും ഒരേപോലെ സമ്മേളിക്കുന്ന ഒരു ‘ഫുൾ പാക്ക്ഡ്’ സിനിമയായിരിക്കും ഇതെന്നാണ് അണിയറപ്രവർത്തകർ നൽകുന്ന സൂചന.
വലിയ താരനിരയാണ് ചിത്രത്തിൽ അണിനിരക്കുന്നത്. ദിലീഷ് പോത്തൻ, സജിൻ ഗോപു, ‘മഞ്ഞുമ്മൽ ബോയ്സ്’ സംവിധായകൻ ചിദംബരം, ജാഫർ ഇടുക്കി, സുധീഷ്, ശരണ്യ രാമചന്ദ്രൻ, പൂജ മോഹൻരാജ് എന്നിവർക്കൊപ്പം രാജേഷ് മാധവനും ചിത്രത്തിൽ പ്രധാന വേഷത്തിൽ എത്തുന്നു. മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫനും ഉദയ പിക്ചേഴ്സിന്റെ ബാനറിൽ കുഞ്ചാക്കോ ബോബനും ചേർന്ന് നിർമ്മിക്കുന്ന ഈ ചിത്രം രണ്ട് പ്രമുഖ പ്രൊഡക്ഷൻ കമ്പനികളുടെ ആദ്യത്തെ ഒന്നിക്കൽ കൂടിയാണ്.
