സിനിമാ സീരിയല് രംഗത്ത് തന്റെ അഭിനയ മികവ് തെളിയിച്ച നടി ലക്ഷ്മി പ്രിയ ഇപ്പോഴിതാ ഒരു തിരക്കഥാകൃത്തിന്റെ പരിവേഷം അണിഞ്ഞ് എത്തുകയാണ്. ആറാട്ട് മുണ്ടന് എന്ന് പേരിട്ടിരിക്കുന്ന ചിത്രം ലക്ഷ്മിയുടെ ഭര്ത്താവായ പി. ജയ് ദേവ് ആണ് സംവിധാനം ചെയ്യുന്നത്. പ്രശസ്ത സംഗീതജ്ഞന് പട്ടണക്കാട് പുരുഷോത്തമന്റെ മകനാണ് ജയ്ദേവ്. ഇപ്പോഴിതാ ചിത്രത്തിന് തുടക്കം കുറിച്ചു എന്ന വാര്ത്തകളാണ് പുറത്ത് വന്നുകൊണ്ടിരിക്കുന്നത്. അമ്പലപ്പുഴ കോറല് ഹൈറ്റ്സില് നടന്ന ചടങ്ങില് എ.എം. ആരിഫ് എംപിയും എച്ച്. സലാം എംഎല്എയും ചേര്ന്ന് ഭദ്രദീപം തെളിച്ചാണ് ചിത്രത്തിന് തുടക്കം കുറിച്ചത്.
രാഷ്ട്രീയ, സാമൂഹിക മണ്ഡലങ്ങളില് ശക്തമായ ചലനങ്ങള് സൃഷ്ടിക്കാന് പ്രാപ്തമായ വിഷയങ്ങള് ചര്ച്ച ചെയ്യുന്ന സിനിമയാണ് ആറാട്ട് മുണ്ടനെന്ന് ലക്ഷ്മി പ്രിയ പറഞ്ഞു. അതേസമയം, നടിയില് നിന്ന് ഒരു തിരക്കഥാകൃത്തായി മാറുമ്പോഴുള്ള മാറ്റത്തെക്കുറിച്ചും നടി വ്യക്തമാക്കുന്നുണ്ട്. ഇതുവരെ അഭിനേത്രി എന്ന നിലയില് യാതൊരു ടെന്ഷനുമില്ലാതെ ഇരുന്ന ഞാന് തിരക്കഥാകൃത്ത് എന്ന മേലങ്കി അണിയുമ്പോള് അത് തരുന്ന സമ്മര്ദ്ദം വളരെ വലുതാണ്. എങ്കിലും എന്നെ വിശ്വസിച്ച് ഈ ദൗത്യം ഏല്പ്പിച്ച കഥാകൃത്ത് രാജേഷ് ഇല്ലത്ത്, നിര്മാതാവ് എം.ഡി സിബിലാല്, സംവിധായകനും എന്റെ പ്രിയപ്പെട്ട ഭര്ത്താവുമായ പി. ജയ് ദേവ് തുടങ്ങി മുഴുവന് പേരോടും നന്ദി അറിയിക്കട്ടെ. എന്നെ ഏല്പിച്ച ഉത്തരവാദിത്തം ഭംഗിയാക്കാന് പരമാവധി ശ്രമിക്കാം എന്നും ലക്ഷ്മി പ്രിയ പറയുന്നു.