കഴിഞ്ഞ ദിവസമാണ് കന്നട താരം യഷിന്റെ പിറന്നാള്‍ ആഘോഷമാക്കാനിരുന്ന ആരാധകര്‍ അപ്രതീക്ഷിത അപകടത്തില്‍ മരണപ്പെട്ടത്. ഇഷ്ട താരത്തിന് പിറന്നാള്‍ ആശംസ അറിയിച്ചുള്ള ഫ്‌ലക്‌സ് കെട്ടുന്നതിനിടെ ഷോക്കേറ്റാണ് മൂന്ന് ആരാധകര്‍ മരണപ്പെട്ടത്. ഇപ്പോഴിതാ മരണപ്പെട്ട ആരാധകരുടെ കുടുംബത്തെ ആശ്വസിപ്പിക്കാന്‍ താരം തന്നെ നേരിട്ട് എത്തിയിരിക്കുകയാണ്.
ആരാധകരുടെ വീട്ടിലെത്തി യഷ് അനുശോചനം അറിയിച്ചു. തന്നോടുള്ള സ്നേഹം പ്രകടിപ്പിക്കേണ്ട രീതി ഇതായിരുന്നില്ല എന്ന് താരം പറഞ്ഞു. നിങ്ങള്‍ എവിടെയായിരുന്നാലും, നിങ്ങള്‍ എന്നെ പൂര്‍ണ്ണ ഹൃദയത്തോടെ സ്നേഹിക്കുന്നത് തന്നെയാണ് ഏറ്റവും വലിയ കാര്യം. ഇതുപോലത്തെ സംഭവങ്ങള്‍ ജന്മദിനത്തില്‍ എന്നെ ഏറെ വേദനിപ്പിക്കുകയും ഭയപ്പെടുത്തുകയുമാണ് ചെയ്യുന്നതെന്നും യഷ് പറഞ്ഞു.
ആരാധന പ്രകടിപ്പക്കേണ്ടത് ഇങ്ങനെയല്ല. ദയവായി നിങ്ങളുടെ സ്നേഹം ഈ തരത്തില്‍ കാണിക്കരുത്. വലിയ ബാനറുകള്‍ തൂക്കരുത്, സിനിമയിലേത് പോലെ ബൈക്ക് ചേസ് ചെയ്യരുത്, അപകടകരമായ സെല്‍ഫികള്‍ എടുക്കരുത് എന്ന് അഭ്യര്‍ത്ഥിക്കുന്നു. എന്റെ എല്ലാ പ്രേക്ഷകര്‍ക്കും ആരാധകര്‍ക്കും വേണ്ടിയാണ് ഞാന്‍ പ്രവര്‍ത്തിക്കുന്നത്. ജീവിതത്തില്‍ നിങ്ങള്‍ ഉയരങ്ങളിലെത്താന്‍ ശ്രമിക്കണമെന്നും യഷ് ആരാധകരോട് പറഞ്ഞു.
നിങ്ങള്‍ എന്റെ ഒരു യഥാര്‍ത്ഥ ആരാധകനാണെങ്കില്‍, നിങ്ങള്‍ നിങ്ങളുടെ കരിയറില്‍ ശ്രദ്ധ കേന്ദ്രീകരിക്കുക, നിങ്ങളുടെ ജീവിതം നിങ്ങള്‍ക്കായി സമര്‍പ്പിക്കുക, സന്തോഷവും വിജയവും നേടുക. നിങ്ങളുടെ കുടുംബങ്ങള്‍ക്ക് എല്ലാം നിങ്ങളാണ്, അവര്‍ക്ക് അഭിമാനികരമാകുന്ന പ്രവര്‍ത്തികള്‍ ചെയ്യുക’, യഷ് കൂട്ടിച്ചേര്‍ത്തു
ഞായറാഴ്ച രാത്രി 11 മണിയോടെയായിരുന്നു യഷ് ആരാധകരുടെ ജീവനെടുത്ത അപകടം. 25 അടിയുള്ള യഷിന്റെ കട്ടൗട്ട് കെട്ടുന്നതിനിടയില്‍ വൈദ്യുതി ലൈനില്‍ നിന്ന് ഷോക്കേല്‍ക്കുകയായിരുന്നു. മൂന്ന് പേരാണ് അപകടത്തില്‍ മരിച്ചത്. പരിക്കേറ്റ മറ്റ് മൂന്ന് പേര്‍ ആശുപത്രിയില്‍ ചികിത്സയിലാണ്. ഹനമന്ത ഹരിജന്‍ (21), മുരളി നടവിന്‍മണി (20), നവീന്‍ ഗാസി (19) എന്നീ യുവാക്കളാണ് വൈദ്യുതാഘാതമേറ്റ് മരിച്ചത്.
യഷിന്റെ 38 -ാം ജന്മദിനമാണ് ഇന്ന്. ടെലിവിഷന്‍ പരമ്പരകളിലൂടെയാണ് യഷ് സിനിമാജീവിതം ആരംഭിച്ചത്. 2007ലിറങ്ങിയ ‘ജംഫതര ഹുടുവാകി’ എന്ന ചിത്രത്തിലൂടെയാണ് സിനിമയില്‍ അരങ്ങേറിയത്. ‘കെജിഎഫ്’ ചിത്രങ്ങളിലൂടെയാണ് താരം ജനപ്രിയതാരമായി മാറിയത്. ഗീതു മോഹന്‍ദാസ് സംവിധാനം ചെയ്യുന്ന ‘ടോക്സിക്’ ആണ് അണിയറയിലൊരുങ്ങുന്ന യഷിന്റെ ചിത്രം.
