ദിയ കൃഷ്ണയുമായി ബന്ധപ്പെട്ട വിവാദങ്ങളുടെ പേരിൽ കുടുംബത്തിലെ മറ്റുള്ളവരെയും വിമർശനങ്ങളിലേക്ക് വലിച്ചിഴയ്ക്കുന്നതിനെതിരെ പ്രതികരണവുമായി നടി അഹാന കൃഷ്ണ. ഓരോ വ്യക്തിക്കും സ്വന്തമായ അഭിപ്രായങ്ങളും നിലപാടുകളുമുണ്ടെന്നും ഒരാളുടെ വാക്കുകൾക്കും പ്രവൃത്തികൾക്കും കുടുംബത്തിലെ എല്ലാവരും ഉത്തരവാദികളാകേണ്ടതില്ലെന്നും അഹാന സോഷ്യൽ മീഡിയയിൽ പങ്കുവെച്ച കുറിപ്പിൽ വ്യക്തമാക്കി.
സ്നേഹത്തോടെയും ഐക്യത്തോടെയും കഴിയുന്ന ആറംഗ കുടുംബമാണ് തങ്ങളുടേതെന്നും എന്നാൽ കുടുംബത്തിലെ ഓരോരുത്തരും സ്വതന്ത്രമായ ചിന്തകളും കാഴ്ചപ്പാടുകളുമുള്ള വ്യക്തികളാണെന്നും അഹാന പറഞ്ഞു. ഒരാളുടെ വ്യക്തിപരമായ അഭിപ്രായത്തെ കുടുംബത്തിന്റെ മൊത്തത്തിലുള്ള നിലപാടായി കാണുന്നത് ശരിയല്ലെന്നും താരം ചൂണ്ടിക്കാട്ടി.
താൻ പറഞ്ഞതിലോ ചെയ്തതിലോ എന്തെങ്കിലും വിയോജിപ്പുണ്ടെങ്കിൽ തന്നോടാണ് ചോദിക്കേണ്ടതെന്നും അച്ഛന്റെയോ അമ്മയുടെയോ സഹോദരിമാരുടെയോ കാര്യത്തിലാണെങ്കിൽ അവരോടുതന്നെ വിശദീകരണം തേടണമെന്നും അഹാന കുറിച്ചു. കുടുംബാംഗങ്ങൾ പൊതുരംഗത്ത് സജീവമായതിനാൽ എല്ലാവരുടെയും അഭിപ്രായങ്ങൾ ഒരുപോലെയാകണമെന്നില്ലെന്നും വിമർശനങ്ങളും അഭിപ്രായവ്യത്യാസങ്ങളും പൊതുജീവിതത്തിന്റെ ഭാഗമാണെന്നും താരം വ്യക്തമാക്കി.
ഒരാളോടുള്ള പ്രശ്നത്തിന്റെ പേരിൽ കുടുംബത്തെ മുഴുവൻ വിവാദത്തിലേക്ക് വലിച്ചിഴയ്ക്കുന്നത് എന്തിനാണെന്നും ഒരു വ്യക്തിയുടെ അഭിപ്രായം എങ്ങനെയാണ് കുടുംബത്തിന്റെ ആകെ നിലപാടായി മാറുന്നതെന്നും അഹാന ചോദിച്ചു. ചർച്ചകളിലേക്ക് കൂടുതൽ പരിചിതമായ പേരുകൾ ഉൾപ്പെടുത്തുന്നത് വിഷയം വ്യക്തമാക്കാനാണോ അതോ ശ്രദ്ധ നേടാനാണോ എന്നും താരം സംശയം പ്രകടിപ്പിച്ചു.
പ്രത്യേകിച്ച്, ബന്ധമില്ലാത്ത വിഷയങ്ങളിലേക്ക് തന്റെ വിവാഹജീവിതത്തെ വലിച്ചിഴയ്ക്കുന്നത് വിചിത്രമായി തോന്നുന്നുവെന്നും അഹാന പറഞ്ഞു. പുരോഗമനത്തെയും യുക്തിചിന്തയെയും കുറിച്ച് സംസാരിക്കുന്നവർ പോലും മറ്റുള്ളവരുടെ സ്വകാര്യജീവിതത്തെ അനാവശ്യ ചർച്ചകളിലേക്ക് കൊണ്ടുവരുന്നത് അവരുടെ യഥാർഥ മനോഭാവം വ്യക്തമാക്കുന്നതാണെന്നും കുറിപ്പിൽ പരാമർശിക്കുന്നു. ആരോഗ്യകരമായ വിമർശനവും ഒരാളുടെ സ്വകാര്യജീവിതവുമായി ബന്ധമില്ലാത്ത കാര്യങ്ങൾ കുത്തിപ്പൊക്കി ചർച്ചയാക്കുന്നതും രണ്ടാണെന്നും താരം ഓർമിപ്പിച്ചു.
ഈ രീതി പെട്ടെന്ന് മാറില്ലെന്ന് അറിയാമെങ്കിലും ഇക്കാര്യം തുറന്നുപറയണമെന്ന് തോന്നിയതിനാലാണ് കുറിപ്പ് പങ്കുവെച്ചതെന്നും അഹാന വ്യക്തമാക്കി. ഒരാളെ അയാളുടെ വാക്കുകൾക്കും പ്രവൃത്തികൾക്കും ഉത്തരവാദിയാക്കുന്നതും ആ വ്യക്തിയുമായി ബന്ധമുള്ള എല്ലാവരെയും വിശദീകരണം നൽകാൻ നിർബന്ധിക്കുന്നതും വ്യത്യസ്തമായ കാര്യങ്ങളാണ്.
കുടുംബമെന്ന നിലയിൽ തങ്ങൾ എന്നും ഒറ്റക്കെട്ടായിരിക്കുമെന്നും അതേസമയം ഓരോരുത്തർക്കും സ്വന്തമായി ചിന്തിക്കാനും സംസാരിക്കാനും പ്രവർത്തിക്കാനുമുള്ള സ്വാതന്ത്ര്യമുണ്ടെന്നും അഹാന കൂട്ടിച്ചേർത്തു. കുടുംബത്തിലെ ഒരാളുടെ നിലപാടിനോട് വിയോജിപ്പുണ്ടെങ്കിൽ അത് പ്രകടിപ്പിക്കാം. എന്നാൽ ആ ചർച്ച ബന്ധപ്പെട്ട വ്യക്തിയിലും വിഷയത്തിലും മാത്രം ഒതുങ്ങണമെന്നും ഒരേ കുടുംബപ്പേര് പങ്കിടുന്നു എന്ന കാരണത്താൽ മറ്റുള്ളവരെയും വിവാദത്തിലേക്ക് വലിച്ചിഴയ്ക്കരുതെന്നും താരം കുറിപ്പിലൂടെ ആവശ്യപ്പെട്ടു.
