ഗായിക റിമി ടോമിയുടെ വിവാഹവാർത്തകളും വിശേഷങ്ങളുമാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്. വിവാഹത്തിനായി മുംബൈയിലെത്തിയ താരം, ലിബിന്റെ ജന്മനാടായ ഡോംബിവല്ലിയിൽ വെച്ചാണ് വിവാഹച്ചടങ്ങുകൾ നടക്കുന്നതെന്ന് വെളിപ്പെടുത്തി. തന്റെ ഫ്ലാറ്റ് പരിചയപ്പെടുത്തുന്ന വീഡിയോയിലൂടെയാണ് വിവാഹത്തെക്കുറിച്ചും ലിബിനുമായുള്ള പ്രണയത്തെക്കുറിച്ചുമുള്ള കൂടുതൽ വിവരങ്ങൾ റിമി പങ്കുവെച്ചത്.
സാധാരണയായി മാസത്തിൽ ഒന്നോ രണ്ടോ തവണ മുംബൈയിലെത്താറുണ്ടെങ്കിലും ഇത്തവണത്തെ യാത്രയ്ക്ക് പ്രത്യേകതയുണ്ടെന്നാണ് റിമി പറയുന്നത്. വിവാഹത്തിനായാണ് ഇത്തവണ മുംബൈയിലേക്ക് പോകുന്നത്. മലയാളിയാണെങ്കിലും മുംബൈയിൽ ജനിച്ചുവളർന്നയാളാണ് ലിബിൻ. അതിനാലാണ് വിവാഹം ഡോംബിവല്ലിയിൽ നടത്താൻ തീരുമാനിച്ചതെന്നും താരം വ്യക്തമാക്കി. വളരെ ലളിതമായ ചടങ്ങായിരിക്കും വിവാഹമെന്നും റിമി പറഞ്ഞു. തന്റെ കുടുംബത്തിൽ നിന്ന് അമ്മയും സഹോദരങ്ങളും അവരുടെ മക്കളുമടക്കം പത്തുപേർ മാത്രമായിരിക്കും പങ്കെടുക്കുക. ലിബിന്റെ കുടുംബാംഗങ്ങളും അടുത്ത ബന്ധുക്കളുമായിരിക്കും ചടങ്ങിലെ മറ്റുള്ളവർ.
ലിബിനുമായുള്ള പ്രണയത്തിന്റെ തുടക്കത്തെക്കുറിച്ചും റിമി വീഡിയോയിൽ മനസ്സുതുറന്നു. നേരിട്ട് കാണുന്നതിന് മുൻപേ ഇരുവരും സംസാരിച്ചുതുടങ്ങിയെന്നും പരസ്പരം മനസ്സിലാക്കി ജീവിതത്തെക്കുറിച്ച് തീരുമാനമെടുത്തെന്നും താരം പറഞ്ഞു. മാർച്ചിലാണ് മുംബൈയിൽ വെച്ച് ലിബിനെ പരിചയപ്പെട്ടത്. അതിനു മുൻപുതന്നെ സംസാരത്തിലൂടെ ഇരുവരും അടുത്തറിയുകയും ഭാവിയെക്കുറിച്ച് തീരുമാനത്തിലെത്തുകയും ചെയ്തിരുന്നു.
ഇക്കാര്യങ്ങളെല്ലാം അമ്മയുമായി പങ്കുവെച്ചിരുന്നുവെന്നും റിമി പറഞ്ഞു. എന്നാൽ നേരിട്ട് കാണുകയോ സംസാരിക്കുകയോ ചെയ്യാത്ത ഒരാളെ പെട്ടെന്ന് വിവാഹം കഴിക്കാൻ തീരുമാനിച്ചതിൽ അമ്മയ്ക്കും സ്വാഭാവികമായ ആശങ്കകളുണ്ടായിരുന്നു. എങ്കിലും തന്റെ വിവാഹം കാണണമെന്നത് അമ്മയുടെ വലിയ ആഗ്രഹമായിരുന്നുവെന്നും റിമി കൂട്ടിച്ചേർത്തു. ലിബിൻ മുംബൈയിൽ വളർന്നതിനാൽ മലയാളം സംസാരിച്ചിരുന്നില്ലെന്നും തന്നെ പരിചയപ്പെട്ട ശേഷമാണ് മലയാളം പഠിച്ചുതുടങ്ങിയതെന്നും റിമി വെളിപ്പെടുത്തി. ഇരുവരുടെയും പ്രണയവിശേഷങ്ങളും വിവാഹ ഒരുക്കങ്ങളും ആരാധകർക്കിടയിൽ ഇതിനോടകം വലിയ ശ്രദ്ധ നേടിക്കഴിഞ്ഞു.
