തിരക്കേറിയ സിനിമാ ജീവിതത്തിനുമപ്പുറം ജീവകാരുണ്യ പ്രവര്‍ത്തനങ്ങളിലും മലയാളത്തിലെ പല മുന്‍ നിര താരങ്ങളും സജ്ജീവമാണ്. എന്നാല്‍ ഇത്തരം ജീവകാരുണ്യ പ്രവര്‍ത്തനങ്ങളെ ഇക്കൂട്ടര്‍ പബ്ലിസിറ്റി നല്‍കാറുമില്ല. സമാന ചിന്താഗതിയും സ്വഭാവവും കാത്തു സൂക്ഷിക്കുന്നവരാണ് മലയാളികളുടെ പ്രീയ താരങ്ങളായ മമ്മുക്കയും മോഹന്‍ലാലും. ഇപ്പോഴിതാ ജീവകാരുണ്യ പ്രവര്‍ത്തനങ്ങളില്‍ ലാലേട്ടന്റെ എക്കാലത്തെയും സ്വപ്‌നങ്ങളിലൊന്ന് പൂവണിഞ്ഞിരിക്കുന്നു.
കഴിഞ്ഞ കുറച്ച് വര്‍ ഷങ്ങളായി വിദ്യാഭ്യാസ രംഗത്തും ആരോഗ്യ രംഗത്തും നിറസാന്നിദ്ധ്യമാണ് നടന്‍ മോഹന്‍ലാലിന്റെ നേതൃത്വത്തിലുള്ള വിശ്വശാന്തി ഫൗണ്ടേഷന്. കൊവിഡ് കാലത്ത് കേരളത്തിലെ ആരോഗ്യ മേഖലയ്ക്ക് കൈത്താങ്ങാകുന്ന നിരവധി പ്രവര്‍ത്തനങ്ങള്‍ നടത്താനും വിശ്വശാന്തി ഫൗണ്ടേഷന് സാധിച്ചിരുന്നു.
വിശ്വശാന്തി ഫൗണ്ടേഷന് കീഴില്‍ ‘വിന്റേജ്’ എന്ന സ്വപ്‌ന പദ്ധതി അവതരിപ്പിച്ചിരിക്കുകയാണ് മോഹന്‍ലാല്‍. പ്രതിവര്‍ഷം ആറാം ക്ലാസ്സില്‍ പഠിക്കുന്ന 20 കുട്ടികളെ വീതം കണ്ടെത്തി അവരുടെ വിദ്യാഭ്യാസത്തിനും മറ്റും സഹായങ്ങള്‍ നല്‍കി സമൂഹത്തില്‍ മിടുക്കരായ വ്യക്തിത്വങ്ങളായി ഉയര്‍ത്തികൊണ്ട് വരുക എന്നതാണ് വിന്റേജിന്റെ ലക്ഷ്യം.
കുട്ടികളെ കണ്ടെത്തുന്നതിന് പ്രത്യേക മാനദണ്ഡങ്ങളും വിശ്വശാന്തി ഫൗണ്ടേഷന് മുന്നോട്ടുവയ്ക്കുന്നുണ്ട്. ഇതിനായി കുട്ടികളെ ഉള്‍പ്പെടുത്തി പ്രത്യേക ക്യാമ്പ് സംഘടിപ്പിക്കുകയാണ് ആദ്യ പടി. തുടര്‍ന്ന് തിരഞ്ഞെടുക്കുന്ന കുട്ടികളുടെ അഭിരുചി തിരിച്ചറിയുകയും, ആ അഭിരുചിയെ വളര്‍ത്തി എടുക്കുന്നതിന് വേണ്ടിയുള്ള എല്ലാ സഹായങ്ങളും ഒരുക്കി നല്‍കുന്നതുമാണ് വിന്റേജിന്റെ രീതി. അട്ടപ്പാടിയില്‍ നിന്നാണ് വിന്റേജ് പദ്ധതിക്ക് തുടക്കമാകുന്നത്.
തന്റെ സ്വപ്‌ന പദ്ധതിയെക്കുറിച്ചുള്ള ഹൃസ്വ വീഡിയോ മോഹന്‍ലാല്‍ തന്റെ ഫെയ്‌സ്ബുക്ക് പേജിലും പോസ്റ്റ് ചെയ്തിട്ടുണ്ട്.
സുമനസുകളുടെ സാന്നിദ്ധ്യ സഹകരണങ്ങള്‍കൊണ്ട് സമൂഹത്തില്‍ ഒട്ടേറെ മികച്ച പ്രവര്‍ത്തനങ്ങള്‍ നടത്താന്‍ വിശ്വശാന്തിക്ക് കഴിഞ്ഞതായി മോഹന്‍ലാല്‍ പറയുന്നു. അറിവ് പകര്‍ന്നുനല്‍കുന്നതാണ് ഏറ്റവും വലിയ കാര്യമെന്ന് പഠിപ്പിച്ച അമ്മയുടെ അനുഗ്രത്തോടെയാണ് തന്റെ സ്വപ്‌ന പദ്ധതിയിലേയക്ക് കടക്കുന്നതെന്നും താരം പറയുന്നു.
അടുത്ത പതിനഞ്ച് വര്‍ഷം തിരഞ്ഞെടുക്കപ്പെടുന്ന കുട്ടികള്‍ക്കൊപ്പം നാം ഉണ്ടാകുമെന്നും രാജ്യത്തിന് അഭിമാനമാകുന്ന സമര്‍ദ്ധരായ യുവാക്കളായി കുട്ടികളെ മാറ്റാന്‍ സാധിക്കുമെന്ന പ്രതീക്ഷയും ലാലേട്ടന്‍ വീഡിയോയില്‍ പങ്കുവെച്ചു.
ആരാധകരും സിനിമാ, സാമൂഹക, സാംസ്‌കാരിക രംഗത്തെ പ്രമുഖരും വിശ്വശാന്തി ഫൗണ്ടേഷന് ആശംസകള്‍ നേര്‍ന്നു. വിശ്വശാന്തി ഫൗണ്ടേഷന്റെ പുതിയ കര്‍മ്മ പദ്ധതിയുടെ ഉദ്ഘാടന ചിത്രം ഉള്‍പ്പടെയാണ് മോഹന്‍ലാല്‍ തന്റെ ഫെയ്‌സ്ബുക്ക് പോസ്റ്റിലുടെ പങ്കുവെച്ചത്.
