അറ് വർഷത്തിന് ശേഷം ഭാവന നായികയായി എത്തുന്ന സിനിമയാണ് ‘ന്റിക്കാക്കാക്കൊരു പ്രേമണ്ടാർന്ന്’. ചിത്രം ഈയാഴ്ച തിയേറ്ററുകളിൽ എത്തില്ല എന്നറിയിക്കുകയാണ് നിർമ്മാതാവ്. ഫെബ്രുവരി 17ന് തിയേറ്ററുകളിൽ എത്തുമെന്ന് പ്രഖ്യാപിച്ചിരുന്ന ചിത്രത്തിന്റെ റിലീസ് നീട്ടിയിരിക്കുകയാണ്. ഫെബ്രുവരി 24നാണ് ചിത്രം റിലീസ് ചെയ്യുക.
”പ്രിയപ്പെട്ടവരെ, ഒഴിവാക്കാൻ കഴിയാത്ത ചില കാരണങ്ങളാൽ ന്റിക്കാക്കയ്‌ക്കൊരു പ്രേമണ്ടാർന്നു എന്ന ചിത്രം നാളെ 17വേ ന് റിലീസ് ചെയ്യാൻ സാധിക്കില്ലന്ന വിവരം ഖേദപൂർവ്വം അറിയിക്കുന്നു. നിങ്ങൾ ആകാംക്ഷയോടെ കാത്തിരിക്കുകയാണെന്ന് ഞങ്ങൾക്കറിയാം. അടുത്ത വെള്ളിയാഴ്ച 24 – ഫെബ്രുവരി ഞങ്ങൾ നിങ്ങളെ തിയേറ്ററിൽ പ്രതീക്ഷിക്കുന്നു..” എന്നാണ് നിർമ്മാതാവ് രാജേഷ് കൃഷ്ണ ഫേസ്ബുക്കിൽ കുറിച്ചത്.
നവാഗതനായ ആദിൽ മൈമൂനത്ത് അഷറഫ് ആണ് ന്റിക്കാക്കാക്കൊരു പ്രേമണ്ടാർന്ന് എന്ന സിനിമയുടെ രചനയും സംവിധാനവും എഡിറ്റിംഗും നിർവ്വഹിച്ചിരിക്കുന്നത്. ഷറഫുദ്ദീൻ, സാനിയ റാഫി, അശോകൻ, അനാർക്കലി നാസർ തുടങ്ങിയരാണ് മറ്റ് പ്രധാന കഥാപാത്രങ്ങൾ. ലണ്ടൻ ടോക്കീസ്, ബോൺഹോമി എന്റർടയ്ൻമെന്റ്സ് എന്നീ ബാനറുകളിൽ രാജേഷ് കൃഷ്ണ, റെനീഷ് അബ്ദുൾഖാദർ എന്നിവർ ചേർന്നാണ് ന്റിക്കാക്കാക്കൊരു പ്രേമണ്ടാർന്ന് നിർമ്മിച്ചിരിക്കുന്നത്
