മിനി സ്‌ക്രീനില്‍ നിന്നും ബിഗ് സ്‌ക്രീനിലേക്കെത്തിയ താരമാണ് നടി സ്വാസിക.സിനിമകളിലെ ചെറിയ റോളുകളില്‍ നിന്നും ഇപ്പോള്‍ നായികയായും എത്തിയിരിക്കുകയാണ് സ്വാസിക. സിദ്ധാര്‍ഥ് ഭരതന്‍ സംവിധാനം ചെയ്ത ‘ചതുരം’ സിനിമയിലൂടെയാണ് സ്വാസികയുടെ നായികാ എന്‍ട്രി.
എ സര്‍ട്ടിഫിക്കറ്റ് നേടിയ ചിത്രം ഇപ്പോള്‍ ഒടിടിയിലും എത്തിയിരിക്കുകയാണ്. മികച്ച പ്രേക്ഷക പ്രതികരണമാണ് ചിത്രം നേടുന്നത്. ചിത്രത്തിലെ പ്രകടനത്തിന് സ്വാസിക മികച്ചാഭിപ്രായം തന്നെയാണ് നേടുന്നത്.
ചിത്രത്തില്‍ ഗ്ലാമറസ് റോളിലായിരുന്നു സ്വാസിക എത്തിയത്. റോഷന്‍ മാത്യു, അലന്‍സിയര്‍ തുടങ്ങിയവരാണ് ചിത്രത്തില്‍ പ്രധാന വേഷങ്ങളില്‍ എത്തിയത്. സ്വാസികയുടെ പ്രകടനം കൈയ്യടി നേടിയിരുന്നു.
ഇപ്പോഴിതാ ചിത്രത്തിന് ശേഷം ജീവിതത്തിലുണ്ടായ മാറ്റം വെളിപ്പെടുത്തുകയാണ് താരം. ചതുരത്തിന് ശേഷം സ്ഥിരം റോളുകളില്‍ നിന്ന് മാറ്റം ലഭിച്ചെന്ന് സ്വാസിക പറയുന്നു. ഇതുവരെ ചെയ്തതെല്ലാം പാവം, അനിയത്തി കുട്ടി വേഷങ്ങളായിരുന്നു. അതില്‍ നിന്നെല്ലാം മാറ്റം ചതുരത്തിലൂടെ ഉണ്ടായി.
എന്നാല്‍ ഇങ്ങനെയൊരു ഗ്ലാമറസ് കഥാപാത്രമല്ല താന്‍ കാത്തിരുന്നത്. ശ്രീദേവി ദേവരാഗത്തില്‍ ചെയ്ത പോലത്തെയായിരുന്നു ആഗ്രഹമെന്നും സ്വാസിക പറയുന്നു. 13 വര്‍ഷമായി അഭിനയത്തിലെത്തിയിട്ടെന്നും സ്വാസിക പറയുന്നു. പക്ഷേ ആത്മസംതൃപ്തി തരുന്ന ഒരു കഥാപാത്രം ലഭിച്ചിട്ടില്ല. അങ്ങനെയൊരു സിനിമയായിരുന്നു വാസന്തി. പക്ഷേ അത് അധികം ആളുകള്‍ കണ്ടിട്ടില്ലെന്നും സ്വാസിക പറയുന്നു.
ചതുരത്തിലേക്ക് വിളിച്ചപ്പോള്‍ യെസ് പറഞ്ഞില്ലെങ്കില്‍ വലിയ നഷ്ടമാകുമെന്ന് തോന്നി. ചതുരത്തിന്റെ സെറ്റില്‍ നിന്നാണ് റോഷന്‍ ഡാര്‍ലിംഗ്സ് എന്ന ഹിന്ദി ചിത്രത്തിലേക്ക് പോയത്.
ഷാരൂഖ്, ആലിയ കൂട്ടായ്മയിലൊരുങ്ങിയ ചിത്രമാണ് ഡാര്‍ലിംഗ്സ്. ചതുരത്തിന്റെ ടീസറെങ്കിലും ഷാരൂഖിനേയോ ആലിയയെയോ കരണ്‍ ജോഹറിനെയോ കാണിക്കണമെന്ന് റോഷനോട് പറഞ്ഞിരുന്നു. അങ്ങനെ പടം കണ്ടിട്ട് ഷാരൂഖ് ഖാന്‍ വിളിക്കുന്നതൊക്കെ സ്വപ്നവും കണ്ടിരുന്നു. പക്ഷെ അവന്‍ അത് ഒന്നും ചെയ്തില്ലെന്നും സ്വാസിക പരാതിയായി പറയുന്നു.
