ബോളിവുഡ് താരം അഭിഷേക് ബച്ചൻ്റെ 50-ാം ജന്മദിനത്തിൽ ആശംസകളുമായി എത്തിയിരിക്കുകയാണ് ഭാര്യയും നടിയുമായ ഐശ്വര്യ റായ്. ഇരുവരും തമ്മിൽ വിവാഹമോചിതരാകുന്നു എന്ന തരത്തിലുള്ള ശക്തമായ അഭ്യൂഹങ്ങൾ നിലനിൽക്കുന്നതിനിടെയാണ് ഇൻസ്റ്റാഗ്രാമിലൂടെ ഐശ്വര്യയുടെ ഈ കുറിപ്പ് പുറത്തുവന്നത്. അഭിഷേകിൻ്റെ കുട്ടിക്കാലത്തെ ഒരു ചിത്രം പങ്കുവെച്ചുകൊണ്ടാണ് താരം തൻ്റെ പ്രിയപ്പെട്ടവന് ആശംസകൾ നേർന്നത്.
‘എൻ്റെ പ്രിയപ്പെട്ട ബേബി പാപ്പയ്ക്ക് 50-ാം ജന്മദിനാശംസകൾ’ എന്നാണ് ഐശ്വര്യ കുറിച്ചത്. ജീവിതത്തിൽ എന്നും സ്നേഹവും സമാധാനവും സന്തോഷവും ആരോഗ്യവും ഉണ്ടാകട്ടെ എന്നും എല്ലാവിധ ഐശ്വര്യങ്ങളും നേരുന്നുവെന്നും ഐശ്വര്യ തൻ്റെ സന്ദേശത്തിൽ ഉൾപ്പെടുത്തിയിട്ടുണ്ട്. താരത്തിന്റെ ഈ കുറിപ്പ് ഇതിനോടകം തന്നെ സോഷ്യൽ മീഡിയയിൽ വൈറലായിക്കഴിഞ്ഞു. ദമ്പതികൾക്കിടയിലെ പ്രശ്നങ്ങൾ സംബന്ധിച്ച വാർത്തകൾക്കിടെ വന്ന ഈ പോസ്റ്റ് ആരാധകർക്ക് വലിയ ആശ്വാസമാണ് നൽകിയിരിക്കുന്നത്.
അമിതാഭ് ബച്ചനും മകന് വൈകാരികമായ രീതിയിൽ ജന്മദിനാശംസകൾ നേർന്നു. അഭിഷേകിനെ അനുഗ്രഹിക്കുന്ന എല്ലാവർക്കും നന്ദി പറഞ്ഞ അദ്ദേഹം, ആരാധകരുടെ സ്നേഹമാണ് മകന് മുന്നോട്ട് പോകാനുള്ള കരുത്തെന്നും തൻ്റെ ബ്ലോഗിലൂടെ കുറിച്ചു. അജയ് ദേവ്ഗൺ, ജാക്കി ഷ്രോഫ് തുടങ്ങിയ നിരവധി പ്രമുഖ താരങ്ങളും അഭിഷേകിന് സോഷ്യൽ മീഡിയയിലൂടെ ആശംസകൾ അറിയിച്ചിട്ടുണ്ട്. ഇതോടെ ബച്ചൻ കുടുംബത്തിലെ ഈ വിശേഷം ബോളിവുഡ് ലോകത്ത് വലിയ ചർച്ചയായിരിക്കുകയാണ്.
