നിവിൻ പോളിയെ നായകനാക്കി ഗിരീഷ് എ.ഡി. സംവിധാനം ചെയ്ത ‘ബെത്‌ലഹേം കുടുംബ യൂണിറ്റ്’ ഒടിടിയിലെത്തിയതോടെ വീണ്ടും സോഷ്യൽ മീഡിയയിൽ ചർച്ചയാകുന്നു. തിയേറ്ററുകളിൽ മികച്ച വിജയം നേടിയ ചിത്രം ആഗോള ബോക്സ് ഓഫീസിൽ 300 കോടി പിന്നിട്ടിരുന്നു. കേരള ബോക്സ് ഓഫീസിലും ചിത്രം മികച്ച നേട്ടം സ്വന്തമാക്കിയിരുന്നു.
തിയേറ്റർ റിലീസിന് പിന്നാലെ നിവിൻ പോളിയുടെ ജസ്റ്റിനും മമിത ബൈജുവിന്റെ ആഷ്‌ലിക്കും ലഭിച്ച സ്വീകാര്യതയ്ക്കൊപ്പം ഇപ്പോൾ സോഷ്യൽ മീഡിയയിൽ കൂടുതൽ ശ്രദ്ധ നേടുന്നത് റോഷൻ ഷാനവാസ് അവതരിപ്പിച്ച ഗ്ലിക്സൺ എന്ന കഥാപാത്രമാണ്. ഒടിടിയിൽ ചിത്രം എത്തിയതോടെ ഗ്ലിക്സണെ കേന്ദ്രീകരിച്ചുള്ള നിരവധി റീലുകളും വീഡിയോകളുമാണ് സമൂഹമാധ്യമങ്ങളിൽ പ്രചരിക്കുന്നത്.
ഗ്ലിക്സൺ മൈസൂർപാക്ക് വാങ്ങി അനിയന്റെ കൈയിൽ നൽകുന്ന രംഗവും ബസിൽനിന്ന് ഇറങ്ങിവരുമ്പോൾ ഗ്ലിക്സണെ കളിയാക്കുന്ന രംഗവുമെല്ലാം സാഡ് ബി.ജി.എം ചേർത്തുള്ള റീലുകളായി വൈറലാകുന്നുണ്ട്. കഥാപാത്രത്തിന്റെ കോമഡി ടൈമിങ്ങിനും പ്രേക്ഷകരിൽനിന്ന് മികച്ച പ്രതികരണമാണ് ലഭിക്കുന്നത്. ഇതോടെ ജസ്റ്റിനൊപ്പം ഗ്ലിക്സണും സോഷ്യൽ മീഡിയയിൽ ആരാധകരുടെ ശ്രദ്ധ നേടുകയാണ്.
ജിയോ ഹോട്ട്സ്റ്റാറിലൂടെയാണ് ചിത്രം ഒടിടി സ്ട്രീമിങ് ആരംഭിച്ചത്. ഓണം റിലീസായി തിയേറ്ററുകളിലെത്തിയ ചിത്രത്തെ മലയാളി പ്രേക്ഷകർ വലിയ ആവേശത്തോടെയാണ് സ്വീകരിച്ചത്. ജസ്റ്റിൻ ചേട്ടനും ആഷ്‌ലിയും പ്രേക്ഷകരുടെ പ്രിയപ്പെട്ട കഥാപാത്രങ്ങളായി മാറിയിരുന്നു.
നിവിൻ പോളിയുടെ കരിയറിലെ ആദ്യ 100 കോടി ചിത്രം ‘സർവം മായ’ ആയിരുന്നുവെന്നും, തുടർന്ന് മാസങ്ങളുടെ ഇടവേളയ്ക്കുശേഷം ആദ്യ 300 കോടി ചിത്രമെന്ന നേട്ടം ‘ബെത്‌ലഹേം കുടുംബ യൂണിറ്റിലൂടെ’ സ്വന്തമാക്കിയെന്നും അണിയറപ്രവർത്തകർ പറയുന്നു.
സംഗീത് പ്രതാപ്, സുരേഷ് കൃഷ്ണ, മീനാക്ഷി രവീന്ദ്രൻ, വിനയ് ഫോർട്ട്, ശ്യാം മോഹൻ തുടങ്ങിയ താരങ്ങളുടെയും പ്രകടനങ്ങൾക്കും ചിത്രത്തിലെ സംഭാഷണങ്ങൾക്കും മികച്ച പ്രതികരണമാണ് ലഭിച്ചത്. വിഷ്ണു വിജയ് ഒരുക്കിയ ചിത്രത്തിലെ ഗാനങ്ങളും പശ്ചാത്തല സംഗീതവും പ്രേക്ഷകർക്കിടയിൽ ശ്രദ്ധ നേടി.
ഭാവന സ്റ്റുഡിയോസ് നിർമിച്ച ചിത്രം മറ്റ് ഭാഷകളിലും പ്രേക്ഷകശ്രദ്ധ നേടുന്നുണ്ട്. ഗിരീഷ് എ.ഡിയും കിരൺ ജോസിയും ചേർന്നാണ് തിരക്കഥ ഒരുക്കിയത്. അജ്മൽ സാബു ഛായാഗ്രഹണവും ആകാശ് ജോസഫ് വർഗീസ് എഡിറ്റിങ്ങും നിർവഹിച്ചു.
