രജനികാന്തിനെ നായകനാക്കി നെൽസൺ ദിലീപ്കുമാർ സംവിധാനം ചെയ്ത ‘ജയിലർ 2’ ആഗോള ബോക്സ് ഓഫീസിൽ മികച്ച കളക്ഷനുമായി മുന്നേറുന്നു. സമ്മിശ്ര പ്രതികരണങ്ങൾക്കിടയിലും തിയേറ്ററുകളിൽ മികച്ച വരുമാനം നേടുന്ന ചിത്രം, സാക്നിൽക്കിന്റെ റിപ്പോർട്ട് പ്രകാരം റിലീസ് ചെയ്ത് ഒൻപത് ദിവസം പിന്നിടുമ്പോൾ ആഗോളതലത്തിൽ 680 കോടി രൂപയാണ് സ്വന്തമാക്കിയിരിക്കുന്നത്. ഒക്ടോബർ 15ന് തിയേറ്ററുകളിലെത്തിയ ചിത്രത്തിന് കേരളത്തിലും വൻ വരവേൽപ്പാണ് ലഭിച്ചത്. സംസ്ഥാനത്ത് 800 സ്ക്രീനുകളിലായി റിലീസ് ചെയ്ത ചിത്രം ആദ്യദിനം 4,000 ഷോകളാണ് പ്രദർശിപ്പിച്ചത്. കേരളത്തിലെ റിലീസുമായി ബന്ധപ്പെട്ട് വലിയ ശ്രദ്ധ നേടിയ ചിത്രം, രജനികാന്തിന്റെയും മലയാളത്തിന്റെ സൂപ്പർതാരം മോഹൻലാലിന്റെയും സാന്നിധ്യം കൊണ്ടും പ്രേക്ഷകർക്കിടയിൽ ഏറെ പ്രതീക്ഷ സൃഷ്ടിച്ചിരുന്നു.
ആദ്യഭാഗമായ ‘ജയിലറി’ൽ അതിഥി വേഷത്തിലെത്തി കൈയടി നേടിയ മോഹൻലാൽ രണ്ടാം ഭാഗത്തിലും എത്തുന്നുണ്ട്. ശിവ രാജ്കുമാറും ചിത്രത്തിൽ തിരിച്ചെത്തുന്നുണ്ട്. ഇരുവരുടെയും സാന്നിധ്യം മലയാളി പ്രേക്ഷകർക്കിടയിൽ ചിത്രത്തോടുള്ള താൽപര്യം വർധിപ്പിച്ച ഘടകങ്ങളിലൊന്നാണ്. അതിഥി താരങ്ങളുടെ പ്രകടനത്തിനും തിയേറ്ററുകളിൽ നിന്ന് മികച്ച പ്രതികരണങ്ങൾ ലഭിക്കുന്നതായാണ് റിപ്പോർട്ടുകൾ.
ചിത്രത്തിന്റെ ഒടിടി സ്ട്രീമിംഗ് അവകാശം ആമസോൺ പ്രൈം വീഡിയോയാണ് സ്വന്തമാക്കിയിരിക്കുന്നത്. തിയേറ്റർ പ്രദർശനത്തിന് ശേഷമായിരിക്കും ചിത്രം ഒടിടിയിൽ എത്തുക. എന്നാൽ ഡിജിറ്റൽ സ്ട്രീമിംഗിന്റെ ഔദ്യോഗിക തീയതി ഇതുവരെ പ്രഖ്യാപിച്ചിട്ടില്ല.
സൺ പിക്ചേഴ്സിന്റെ ബാനറിൽ കലാനിധി മാരനാണ് ചിത്രം നിർമിച്ചിരിക്കുന്നത്. കേരളത്തിലെ വിതരണാവകാശം ശ്രീ ഗോകുലം മൂവീസിനാണ്. രജനികാന്ത് മുത്തുവേൽ പാണ്ഡ്യനായി വീണ്ടും എത്തുന്ന ചിത്രത്തിൽ സുരാജ് വെഞ്ഞാറമൂട്, എസ്.ജെ. സൂര്യ, വിദ്യ ബാലൻ, മിഥുൻ ചക്രവർത്തി, യോഗി ബാബു, ഹക്കീം ഷാജഹാൻ തുടങ്ങിയവരും പ്രധാന വേഷങ്ങളിലെത്തുന്നു. വിജയ് കാർത്തിക് കണ്ണൻ ഛായാഗ്രഹണവും ആർ. നിർമ്മൽ എഡിറ്റിംഗും നിർവഹിച്ചിരിക്കുന്നു. അനിരുദ്ധ് രവിചന്ദറാണ് സംഗീതസംവിധായകൻ. ബ്ലോക്ക്ബസ്റ്റർ വിജയമായ ആദ്യഭാഗത്തിന് പിന്നാലെ എത്തിയ രണ്ടാം ഭാഗത്തിന്റെ ബോക്സ് ഓഫീസ് പ്രകടനം സിനിമാലോകവും ആരാധകരും ഉറ്റുനോക്കുകയാണ്.
