ഉണ്ണി മുകുന്ദനെ നായകനാക്കി ഹനീഫ് അഥേനി ഒരുക്കുന്ന ചിത്രമാണ് ‘മാര്‍ക്കോ’. ആരാധകലോകം ഏറെ പ്രതീക്ഷയോടെ കാത്തിരിക്കുന്ന ചിത്രമാണ് മാര്‍ക്കോ. ഇപ്പോഴിതാ ചിത്രത്തിന്റെ അപ്‌ഡേറ്റ് പുറത്തുവിട്ടിരിക്കുകയാണ് അണിയറപ്രവര്‍ത്തകര്‍.
ചിത്രത്തിന് വേണ്ടി സംഗീതമൊരുക്കുന്നത് കെ.ജി.എഫ് ഉള്‍പ്പെടെ നിരവധി കന്നട പടങ്ങള്‍ക്കുവേണ്ടി സംഗീത സംവിധാനം നിര്‍വഹിച്ച രവി ബസ്രുര്‍ ആണെന്നാണ് പുതിയ റിപ്പോര്‍ട്ട്. ഉണ്ണി മുകുന്ദന്‍ ചിത്രത്തിലൂടെ രവി ബസ്രുര്‍ മലയാളത്തിലേക്ക് ചുവടുവയ്ക്കുകയാണ്.
രവി ബസ്രുര്‍ തന്നെയാണ് ‘മാര്‍ക്കോ’ക്കുവേണ്ടി ഗാനങ്ങള്‍ ചിട്ടപ്പെടുത്തുന്ന കാര്യം അറിയിച്ചത്. തന്റെ ഔദ്യോഗിക സോഷ്യല്‍ മീഡിയ പേജിലൂടെയാണ് ഇക്കാര്യം പുറത്തുവിട്ടത്. ക്യൂബ്‌സ് എന്റര്‍ടെയ്ന്‍മെന്റ്‌സും യു.എഫ്.എം പ്രൈവറ്റ് ലിമിറ്റഡും ചേര്‍ന്നാണ് മാര്‍ക്കോയുടെ നിര്‍മാണം. ഷരീഫ് മുഹമ്മദ്, അബ്ദുല്‍ ഗദ്ദാഫ് എന്നിവരാണ് ചിത്രത്തിന്റെ പ്രൊഡ്യൂസര്‍മാര്‍.
ഉഗ്രാം എന്ന ചിത്രത്തിലൂടെയാണ് രവി ബസ്രുര്‍ ചലച്ചിത്ര ലോകത്തേക്ക് അരങ്ങേറ്റം കുറിച്ചത്. കന്നട സിനിമയില്‍ സൗണ്ട് ഡിസൈനര്‍, ഗാനരചയിതാവ്, സംഗീത സംവിധായകന്‍ എന്നീ മേഖലകളിലെല്ലാം കൈയ്യൊപ്പ് ചാര്‍ത്തിയ രവിയെ കെജിഎഫ് സീരീസുകളാണ് ആരാധകരുടെ പ്രിയ താരമാക്കിയത്.
ഈ വര്‍ഷം തന്നെ ‘മാര്‍ക്കോ’ തീയേറ്ററുകളില്‍ എത്തും. മാര്‍ക്കറ്റിങ്: വിപിന്‍ കുമാര്‍, ഡിജിറ്റല്‍ മാര്‍ക്കറ്റിംങ് ആന്‍ഡ് പ്രൊമോഷന്‍സ്: ഒബ്‌സ്‌ക്യുറ എന്റെര്‍ടൈന്‍മെന്റ് എന്നിവരാണ് ചിത്രത്തിന്റെ മറ്റ് അണിയറപ്രവര്‍ത്തകര്‍.
